ജല്‍പായ്ഗുരി: പശ്ചിമ ബംഗാളിലെ ജല്‍പായ്ഗുരിയില്‍ ട്രെയിന്‍ പാളംതെറ്റി. ഗുവാഹത്തി-ബിക്കാനെര്‍ എക്‌സ്പ്രസാണ് അപകടത്തില്‍പ്പെട്ടത്. മറിഞ്ഞു കിടക്കുന്ന ബോഗികള്‍ക്കടിയില്‍ നിരവധി യാത്രക്കാര്‍ കുടുങ്ങിക്കിടക്കുന്നതായി റിപ്പോര്‍ട്ടുണ്ട്. വടക്കന്‍ ബംഗാളിലെ ജല്‍പായ്ഗുരി ജില്ലയില്‍ മൈനാഗുരിക്കടുത്താണ് അപകടം നടന്നത്. പ്രാഥമികാന്വേഷണത്തില്‍ നിരവധി യാത്രക്കാര്‍ക്ക് പരുക്കേറ്റതായി റെയില്‍വേ ഉദ്യോഗസ്ഥര്‍ അറിയിച്ചു. അപകടത്തില്‍പ്പെട്ട 12 പേരെ ആശുപത്രിയിലേക്ക് മാറ്റിയിട്ടുണ്ട്. ട്രെയിനിന്റെ 12 ബോഗികളാണ് അപകടത്തില്‍പ്പെട്ടത്. ഇവയുടെ അവശിഷ്ടങ്ങള്‍ക്കടിയില്‍നിന്ന് യാത്രക്കാരെ രക്ഷിക്കുന്ന ദൃശ്യങ്ങള്‍ സമൂഹ മാധ്യമങ്ങളിലൂടെ പ്രചരിക്കുന്നുണ്ട്.