റിയാദ്: സഊദിയിലേക്ക് വരുന്ന ഇന്ത്യൻ പ്രവാസികളുടെ ഇടത്താവളമായി ഒമാൻ മാറുന്നു. ഇന്ത്യയിൽ നിന്നും യുഎഇയിൽ നിന്നും നേരിട്ട് വിമാന സർവ്വീസ് സാധ്യമല്ലെന്നിരിക്കെ പതിനാല് ദിവസത്തെ ക്വാറന്റൈൻ ഇടത്താവളമായി പ്രവാസികൾ ഒമാൻ തിരഞ്ഞെടുക്കുന്നതായാണ് റിപ്പോർട്ടുകൾ. ഒമാൻ വഴി സഊദിയിലേക്ക് ട്രാവൽസുകൾ പ്രത്യേക പാക്കേജുകളും പ്രഖ്യാപിച്ചിട്ടുണ്ട്. സഊദി പ്രവാസികളുടെ ഇടത്താവളമായി ഒമാൻ മാറുന്നതായി ഒമാൻ ഒബ്‌സർവർ റിപ്പോർട്ട് ചെയ്‌തു. കഴിഞ്ഞയാഴ്ച്ചയാണ് ഇന്ത്യ, യുഎഇ ഉൾപ്പെടെ 20 രാജ്യങ്ങളിൽ നിന്നുള്ളവർക്ക് നേരിട്ട് പ്രവേശിക്കുന്നതിൽ സഊദി അറേബ്യ വിലക്കേർപ്പെടുത്തിയത്. ഇതേ തുടർന്ന് നേരത്തെ ദുബായ് വഴി മലയാളികൾ അടക്കമുള്ളവർ എത്തിയിരുന്നെങ്കിലും നിലവിൽ ഇത് നിലച്ചതോടെയാണ് ഒമാൻ ഇടത്താവളമായി പ്രവാസികൾ തിരഞ്ഞെടുത്തത്. പരിവർത്തനം ചെയ്ത കൊവിഡ് -19 വ്യാപനം കാരണം ഫെബ്രുവരി അവസാനം വരെ ഒമാൻ റോഡ് അതിർത്തികൾ അടച്ചിരിക്കുകയാണ്. എങ്കിലും, കർശനമായ കൊവിഡ് -19 പ്രോട്ടോക്കോളുകൾ പാലിച്ച് ആളുകളെ വിമാനമാർഗ്ഗം സ്വാഗതം ചെയ്യുന്നുണ്ട്.

     സഊദി അറേബ്യയിലെ പ്രവാസിക്ക് ആവശ്യമായ ക്വാറന്റൈൻ നടപടിക്രമങ്ങൾ പൂർത്തിയാക്കിയ ശേഷം ഒമാനിലൂടെ കടന്നുപോകാമെന്നും ഒമാനിൽ നിന്നും ജിദ്ദയൊഴികെ വിവിധ സഊദി വിമാനത്താവളങ്ങളിലേക്ക് ഒമാൻ എയർ, സലാം എയർ എന്നിവ സർവ്വീസുകൾ നടത്തുന്നുണ്ടെന്നും അൽഹിന്ദ് ട്രാവൽസ് ജിസിസി, ആഫ്രിക്ക ചീഫ് ഓപ്പറേറ്റിങ് ഓഫീസറും വ്യോമയാന വിദഗ്ദ്ധനുമായ റീന റഹ്‌മാൻ പറഞ്ഞു. ഒമാനിലെ ക്വാറന്റൈനിൽ കഴിയുന്നതിന് മിക്ക ട്രാൻസിറ്റ് യാത്രക്കാരും മുൻ‌കൂട്ടി തന്നെ ടിക്കറ്റ് ബുക്ക് ചെയ്തിട്ടുണ്ട്. ഒമാനിൽ ക്വാറന്റൈനിൽ താമസിക്കുന്നതിന് മിക്ക ട്രാൻസിറ്റ് യാത്രക്കാരും മുൻ‌കൂട്ടി തന്നെ ടിക്കറ്റ് ബുക്ക് ചെയ്തിട്ടുണ്ട്, അതിനാൽ മസ്കറ്റിലെ ട്രാവൽ ഓഫീസുകൾക്ക് ഇതിന്റെ പ്രയോജനം ലഭിക്കാനുള്ള സാധ്യത കുറവാണ്. ഇവർ ഒന്നുകിൽ‌ അവരുടെ സുഹൃത്തുക്കൾക്കൊപ്പമോ ബന്ധുക്കൾക്കൊപ്പമോ താമസിക്കുന്നുവെന്നും അല്ലെങ്കിൽ‌ പ്രതിദിനം ശരാശരി 10 ഒമാൻ റിയാൽ (1891 രൂപ) ഈടാക്കുന്ന ബജറ്റ് ഹോട്ടലുകളിലോ ക്വാറന്റൈൻ കേന്ദ്രങ്ങളിലോ താമസിക്കുന്നുവെന്നും ഒമാൻ ഒബ്‌സർവർ റിപ്പോർട്ട് ചെയ്യുന്നു.

    ക്വാറന്റൈൻ കേന്ദ്രങ്ങൾക്ക് ഇപ്പോൾ ആവശ്യക്കാർ കൂടി വരികയാണെന്നും മികച്ചതും താങ്ങാവുന്ന നിരക്കിലുള്ളതുമായ ക്വാറന്റൈൻ കേന്ദ്രങ്ങൾ തങ്ങൾ ഒരുക്കുന്നുണ്ടെന്നും മെഡ്സ്റ്റാർ ക്വാറന്റൈൻ സെന്റർ സിഇഒയും ഡയറക്ടറുമായ സീനിയ ബിജു പറഞ്ഞു. ഏതായാലൂം വെല്ലുവികൾ ഉണ്ടന്നും, ചിലവാണ് ഏറ്റവും വലിയ വെല്ലുവിളിയെന്നും യാത്രക്കാർ പറയുന്നുണ്ട്. ഒമാൻ വഴി സഊദിയിലേക്കുള്ള ടിക്കറ്റുകൾ, വിസ, ക്വാറന്റൈൻ സൗകര്യം, പിസിആർ ടെസ്റ്റ്, ഇൻഷുറൻസ് തുടങ്ങിയവ ഉൾപ്പെടെ കുറഞ്ഞത് 500 ഒമാൻ റിയാലിന് തുല്യമായ തുകയാണ് ഈടാക്കുന്നത്. എങ്കിലും ജോലിയിലേക്ക് മടങ്ങാൻ ആഗ്രഹിക്കുന്നവർക്ക് ഇത് ഒരു വലിയ അനുഗ്രഹമാണെന്ന് യാത്രക്കാർ പറയുന്നു. ഫെബ്രുവരി 6 മുതൽ വിദേശികൾക്കുള്ള പ്രവേശന വിലക്ക് കുവൈതും കൊണ്ട് വന്നതിനാൽ കുവൈത്തിലേക്കുള്ള നിരവധി പ്രവാസികളും നിലവിൽ ഒമാനിലുണ്ട്. കുവൈത്ത് തീരുമാനം മാറ്റാനായി തങ്ങൾ കാത്തിരിക്കുകയാണെന്നും ഒമാൻ 30 ദിവസത്തെ വിസ അനുവദിച്ചത് വലിയ ആശ്വാസമാണെന്നും കുവൈത്തിലേക്ക് പോകാനായി ഒമാനിൽ കാത്തിരിക്കുന്ന പ്രവാസികൾ പറഞ്ഞു.