ബംഗളൂര്‍: ഐ.എസ്.എല്ലില്‍ ബംഗളൂരുവിനോട് ഒരുഗോളിന് തോറ്റ് കേരളാ ബ്ലാസ്‌റ്റേഴ്‌സ്. പ്ലേ ഓഫിലെത്താന്‍ ബ്ലാസ്റ്റേഴ്‌സ് ഇനിയും കാത്തിരിക്കണം. 32ാം മിനുട്ടില്‍ റോയ് കൃഷ്ണയാണ് ബംഗളൂരുവിനായി വിജയഗോള്‍ നേടിയത്. തുടര്‍ച്ചയായ ആറാം ജയത്തോടെ ബംഗളൂരു പ്ലേ ഓഫ് സാധ്യതകള്‍ സജീവമാക്കി.

കളിയുടെ തുടക്കം മുതല്‍ ബംഗളൂരുവിനായിരുന്നു മുന്‍തൂക്കം. ജാവിയര്‍ ഹെര്‍ണാണ്ടസ് നല്‍കിയ പന്തുമായി ബോക്‌സിലേക്ക് മുന്നേറിയ കൃഷ്ണ, ബ്ലാസ്‌റ്റേഴ്‌സ് ഗോള്‍കീപ്പര്‍ പ്രഭ്‌സുഖന്‍ ഗില്ലിനും പോസ്റ്റിനും ഇടയിലെ സ്ഥലത്തിലൂടെ പന്ത് വലയിലെത്തിക്കുകയായിരുന്നു. തോല്‍വിയോടെ എടികെ മോഹന്‍ ബഗാനും ഹൈദരാബാദ് എഫ്‌സിക്കുമെതിരായ അവസാന മത്സരങ്ങള്‍ ബ്ലാസ്റ്റേഴ്‌സിന് നിര്‍ണായകമായി.

18 കളികളില്‍ നിന്ന് 28 പോയന്റുള്ള ബംഗളൂരു അഞ്ചാം സ്ഥാനത്താണ്. 31 പോയന്റുള്ള ബ്ലാസ്‌റ്റേഴ്‌സ് മൂന്നാം സ്ഥാനത്ത് തുടരകയാണ്. കൊച്ചിയിലെ തോല്‍വിക്ക് സ്വന്തം മൈതാനത്ത് കേരള ബ്ലാസ്‌റ്റേഴ്‌സിനോട് പകരംവീട്ടുകയായിരുന്നു ബംഗളൂരു എഫ്‌സി.