ദുബൈ: കുവൈത്തില്‍ ഇന്ന് ഉച്ച മുതല്‍ ആരംഭിച്ച ശക്തമായ പൊടിക്കാറ്റിനെ തുടര്‍ന്ന് കുവൈറ്റ് അന്താരാഷ്ട്ര വിമാനത്താവളത്തിലെ വിമാനങ്ങള്‍ താത്കാലികമായി നിര്‍ത്തിവച്ചു. കുവൈത്ത് ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷനാണ് ഇക്കാര്യം അറിയിച്ചത്. തിങ്കളാഴ്ച കുവൈറ്റിനെ മൂടിയ പൊടിക്കാറ്റ് രാജ്യത്തെ അന്താരാഷ്ട്ര വിമാനത്താവളത്തിലേക്കുള്ള വിമാന സര്‍വീസുകളെ ബാധിച്ചതായാണ് സിവില്‍ ഏവിയേഷന്‍ റെഗുലേറ്റര്‍ അറിയിപ്പ്. നിലവിലെ കാലാവസ്ഥയ്ക്ക് മാറ്റം വന്നാലേ വിമാനഗതാഗതം സാധാരണ നിലയിലേക്ക് വരികയുള്ളൂവെന്ന് സിവിലില്‍ ഏവിയേഷനുമായി ബന്ധപ്പെച്ച ഡപ്യൂട്ടി ഡയരക്ടര്‍ ജനറല്‍ ഇമാദ് അല്‍ ജുലുവി പറഞ്ഞു. മെയ് 16ന് പൊടിക്കാറ്റ് കാരണം പ്രധാന വിമാനത്താവളത്തില്‍ വ്യോമഗതാഗതം ഒന്നര മണിക്കൂര്‍ നിര്‍ത്തിയിരുന്നു. ഗള്‍ഫ് മേഖലയിലുടനീളം കഴിഞ്ഞ ആഴ്ച പൊടിക്കാറ്റ് വ്യാപിച്ചിരുന്നു.