റിയാദ്: സഊദി വിദേശകാര്യമന്ത്രി പ്രിൻസ് ഫൈസൽ ബിൻ ഫർഹാൻ അൽ സൗദും ഇറാൻ വിദേശകാര്യമന്ത്രി ഹുസൈൻ അമീർ-അബ്ദുള്ളാഹിയാനും വരും ദിവസങ്ങളിൽ കൂടിക്കാഴ്ച നടത്തും. ഇരുവരും ചേർന്ന് നടത്തിയ ഒരു ഫോൺ കോളിൽ ആണ് കൂടിക്കാഴ്ചക്ക് സമ്മതിച്ചത്. അതേസമയം, യോഗത്തിന്റെ തീയതിയും സ്ഥലവും മന്ത്രാലയം വ്യക്തമാക്കിയിട്ടില്ല.

ഉഭയകക്ഷി ബന്ധത്തിന്റെ "പോസിറ്റീവ് ട്രെൻഡിൽ" അമീർ-അബ്ദുള്ളാഹിയൻ സംതൃപ്തി പ്രകടിപ്പിച്ചതായി ഇറാൻ വിദേശകാര്യ മന്ത്രാലയത്തിന്റെ വെബ്‌സൈറ്റ് പറയുന്നു.

സഊദി വിദേശകാര്യ മന്ത്രി ഇരു രാജ്യങ്ങളിലെയും ഉദ്യോഗസ്ഥർ തമ്മിലുള്ള നിരന്തര സമ്പർക്കത്തിന്റെയും കൂടിക്കാഴ്ചകളുടെയും ആവശ്യകത ഫോണിൽ ഊന്നിപ്പറഞ്ഞു. ഇറാനും സഊദിയും നടത്തുന്ന നടപടികളുടെ പ്രവണത “പോസിറ്റീവും തൃപ്തികരവുമാണ്” എന്ന് ഫോൺ വിളിയുടെ ഭാഗമായി വിലയിരുത്തുന്നു.

ഇരു രാജ്യങ്ങളും തമ്മിൽ നയതന്ത്ര ബന്ധം സാധാരണ നിലയിലാക്കുന്നതിനും എംബസികളും മിഷനുകളും രണ്ട് മാസത്തിനുള്ളിൽ വീണ്ടും തുറക്കുന്നതുമായി ബന്ധപ്പെട്ട് മാർച്ച് 10 ന് ഇറാനും സൗദി അറേബ്യയും ബെയ്ജിംഗിൽ വെച്ച് കരാർ ഒപ്പ് വെച്ചിരുന്നു. ഈ കരാറിന്റെ ഏറ്റവും പുതിയ വ്യവസ്ഥയും വിദേശകാര്യ മന്ത്രിമാർ ചർച്ച ചെയ്തതായി വാർത്താ ഏജൻസി റിപ്പോർട്ട് ചെയ്തു.

കരാർ ഒപ്പിട്ടതിന് ശേഷം കഴിഞ്ഞ ആഴ്‌ചകളിൽ രണ്ട് ഉന്നത നയതന്ത്രജ്ഞർ തമ്മിലുള്ള മൂന്നാമത്തെ ഫോൺ സംഭാഷണമായിരുന്നു ഇപ്പോൾ നടന്നത്. മാർച്ച് അവസാനത്തിൽ നടന്ന മറ്റൊരു ഫോൺ സംഭാഷണത്തിൽ, ഏപ്രിൽ അവസാനത്തോടെ അവസാനിക്കുന്ന റമദാൻ നോമ്പ് മാസത്തിൽ ഉഭയകക്ഷി കൂടിക്കാഴ്ച നടത്തുന്നതിനെക്കുറിച്ച് രണ്ട് വിദേശകാര്യ മന്ത്രിമാരും അഭിപ്രായങ്ങൾ കൈമാറി.