ന്യൂഡല്‍ഹി: അലോപ്പതിക്കെതിരേ നടത്തിവന്ന പ്രചാരണത്തിനൊടുവില്‍ വിവാദ യോഗ ഗുരുവും വ്യവസായിയുമായ ബാബാ രാംദേവും ഇന്ത്യന്‍ മെഡിക്കല്‍ അസോസിയേഷനും (ഐ.എം.എ) പരസ്യ ഏറ്റുമുട്ടലില്‍. കൊവിഡ് വ്യാപനംമൂലം ഇന്ത്യ തരിച്ചുനില്‍ക്കുന്നതിനിടെ അലോപ്പതി മരുന്നുകള്‍ക്കെതിരായ രാംദേവിന്റെ പ്രചാരണങ്ങള്‍ ഐ.എം.എയെ ചൊടിപ്പിച്ചിരുന്നു. ഇതേച്ചൊല്ലിയുള്ള തര്‍ക്കമാണ് ഏറ്റുമുട്ടലിലെത്തിയത്. അലോപ്പതിവിരുദ്ധ പരാമര്‍ശങ്ങളുടെ പശ്ചാത്തലത്തില്‍ രാംദേവിന് ഐ.എം.എ ആയിരം കോടി രൂപയുടെ മാനനഷ്ട നോട്ടിസയച്ചു.

അലോപ്പതി ചികിത്സാരീതിക്കെതിരായ പ്രസ്താവന പിന്‍വലിക്കുന്നതായി 15 ദിവസത്തിനുള്ളില്‍ വിഡിയോ പോസ്റ്റ് ചെയ്യുകയും രേഖാമൂലം ഖേദപ്രകടനം നടത്തുകയും ചെയ്യണമെന്നാണ് നോട്ടിസിലെ ആവശ്യം. രാംദേവിനെതിരേ ശക്തമായ നടപടി സ്വീകരിക്കണമെന്നാവശ്യപ്പെട്ട് ഉത്തരാഖണ്ഡ് മുഖ്യമന്ത്രിക്കും ചീഫ് സെക്രട്ടറിക്കും ഐ.എം.എ കത്തുനല്‍കിയിട്ടുണ്ട്.

വാക്‌സിന്‍ സ്വീകരിച്ചിട്ടും ആയിരക്കണക്കിന് ഡോക്ടര്‍മാര്‍ മരിച്ചെന്നും അലോപ്പതി മരുന്നു കഴിച്ചിട്ട് ലക്ഷങ്ങളാണ് മരിക്കുന്നതെന്നുമായിരുന്നു രാംദേവിന്റെ പരാമര്‍ശം. സംഘ്പരിവാറിന്റെ സാമ്പത്തിക സ്രോതസ്സുകളിലൊന്നായ പതഞ്ജലിയുടെ മേധാവിയും സംഘ്പരിവാര്‍ സഹയാത്രികനുമായ രാംദേവിനെതിരായ ഐ.എം.എയുടെ നീക്കങ്ങളില്‍ നിലപാട് സ്വീകരിക്കാനാവാത്ത അവസ്ഥയിലാണ് കേന്ദ്രം. കൊവിഡിന്റെ ആദ്യഘട്ട വ്യാപനത്തില്‍ പ്രതിരോധമരുന്ന് എന്നവകാശപ്പെട്ട് രാംദേവ് പുറത്തിറക്കിയ ഉല്‍പന്നങ്ങളുടെ പരസ്യത്തില്‍ കേന്ദ്ര ആരോഗ്യ മന്ത്രിയുള്‍പ്പെടെയുള്ളവര്‍ പങ്കെടുത്തിരുന്നു.

രാജ്യത്തെ ആരോഗ്യരംഗം കൊവിഡിനെ തുരത്താന്‍ തീവ്രശ്രമം നടത്തിവരുമ്പോഴെല്ലാം അലോപ്പതി ചികിത്സാരീതിയെ പരിഹസിച്ചുവരികയായിരുന്നു രാംദേവ്. ഐ.എം.എയുടെ ഭാഗത്തുനിന്നുള്ള കടുത്ത എതിര്‍പ്പിനൊടുവില്‍ രാംദേവിനോട് വിയോജിക്കുന്നതായി മയപ്പെടുത്തിയുള്ള പ്രതികരണം പുറപ്പെടുവിക്കുകയായിരുന്നു കേന്ദ്ര ആരോഗ്യ മന്ത്രിയും അലോപ്പതി ഡോക്ടറുമായ ഡോ. ഹര്‍ഷവര്‍ധന്‍.
അതിനിടെ, ഐ.എം.എയ്‌ക്കെതിരേ പതഞ്ജലി കേന്ദ്രങ്ങള്‍ വര്‍ഗീയപ്രചാരണവും ആരംഭിച്ചു.