അഹമ്മദാബാദ്: ഗുജറാത്തിലെ മുന്ദ്ര തുറമുഖത്ത് 52 കി.ഗ്രാം കൊക്കൈന്‍ പിടികൂടി. 500 കോടി വിലമതിക്കുന്ന കൊക്കൈനാണ് പിടികൂടിയത്. ഓപറേഷന്‍ നംകീന്‍ എന്ന പേരില്‍ ഡയരക്ടറേറ്റ് ഓഫ് റവന്യൂ ഇന്റലിജന്‍സ് (ഡി.ആര്‍.ഐ) നടത്തിയ പരിശോധനയിലാണ് ഉപ്പുചാക്കുകളില്‍ ഒളിപ്പിച്ചിരുന്ന മയക്കുമരുന്ന് പിടികൂടിയത്.

രഹസ്യ വിവരത്തിന്റെ അടിസ്ഥാനത്തില്‍ ചൊവ്വാഴ്ച ഡി.ആര്‍.ഐ ആരംഭിച്ച റെയ്ഡിനൊടുവിലാണ് വന്‍ മയക്കുമരുന്ന് കടത്ത് പിടികൂടിയത്. മയക്കുമരുന്ന് അടങ്ങുന്ന ചരക്കുകള്‍ ഇറാനില്‍നിന്ന് മുന്ദ്ര തുറമുഖത്തേക്ക് വരുന്നതായിട്ടായിരുന്നു രഹസ്യ വിവരം. സംശയാസ്പദമായ രീതിയില്‍ കണ്ടെത്തിയ ചാക്കുകള്‍ പരിശോധിക്കുകയായിരുന്നു അന്വേഷണസംഘം. 1,000ത്തോളം ചാക്കുകളിലായായിരുന്നു കൊക്കൈന്‍ ഒളിപ്പിച്ചിരുന്നത്.

പിടികൂടിയ കൊക്കൈന്റെ സാംപിളുകള്‍ ഗുജറാത്ത് സര്‍ക്കാരിനു കീഴിലുള്ള ഫോറന്‍സിക് സയന്‍സസ് ഡയരക്ടറേറ്റില്‍ പരിശോധനയ്ക്കു വിധേയമാക്കി. ചരക്കുകളില്‍ കൊക്കൈനും ഉള്‍പ്പെട്ടിട്ടുണ്ടെന്ന് പരിശോധനയില്‍ വ്യക്തമായിട്ടുണ്ട്. ചരക്കുകളുമായി പിടിയിലായവരെ ചോദ്യം ചെയ്തുവരികയാണ്.

കഴിഞ്ഞ വര്‍ഷം മുന്ദ്ര തുറമുഖത്തുനിന്ന് 3,200 കോടി രൂപയുടെ കൊക്കൈന്‍ പിടികൂടിയിരുന്നു. 321 കി.ഗ്രാം കൊക്കൈനാണ് പിടിയിലായത്.