കൊൽക്കത്ത
പശ്ചിമ ബംഗാളിൽ ചാൻസലർ വിഷയത്തിൽ സർക്കാരും ഗവർണറും ഏറ്റുമുട്ടലിന്റെ പാതയിൽ. സർവകലാശാലകളുടെ ചാൻസലർ പദവി ഗവർണർ ജഗദീപ് ധൻഖാറിൽ നിന്ന് മുഖ്യമന്ത്രി മമതാ ബാനർജി ഏറ്റെടുക്കണമെന്ന് സർക്കാർ തീരുമാനിച്ചു.
മന്ത്രിസഭാ യോഗത്തിലാണ് സംസ്ഥാനത്തെ എല്ലാ സർവകലാശാലകളുടെയും ചാൻസലർ പദവി മുഖ്യമന്ത്രി മമതാ ബാനർജി ഏറ്റെടുക്കാൻ തീരുമാനിച്ചത്. ഇതിനായി നിയമസഭയിൽ ബിൽ കൊണ്ടുവരുമെന്നും സംസ്ഥാന വിദ്യാഭ്യാസ മന്ത്രി ഭ്രത്യ ബസു പറഞ്ഞു. മറ്റ് സംസ്ഥാനങ്ങളിലേതിനു പോലെ നിലവിൽ ഗവർണർ ആണ് ബംഗാളിലെ സർവകലാശാലകളുടെ ചാൻസലർ. നിയമസഭയിൽ ബിൽ അവതരിപ്പിച്ച് നിയമ ഭേദഗതി നടത്താനാണ് സർക്കാർ നീക്കം.

ഗവർണർ സംസ്ഥാനത്തെ 17 സർവകലാശാലകളുടെ ചാൻസലറാണെന്നാണ് രാജ്ഭവൻ വെബ്‌സൈറ്റ് പറയുന്നത്. ഇതിൽ കൽക്കട്ട, ജാദവപൂർ, കല്യാണി, രബീന്ദ്ര ഭാരതി, വിദ്യാസാഗർ, ബർദ്വാൻ, നോർത്ത് ബംഗാൾ എന്നിവ പ്രമുഖ സർവകലാശാലകളാണ്. ശാന്തി നികേതനിലെ വിശ്വഭാരതി സർവകലാശാലയിൽ ഗവർണർ റെക്ടറാണ്.

ഇവിടെ പ്രധാനമന്ത്രി നരേന്ദ്രമോദിയാണ് ചാൻസലർ. ജനുവരിയിൽ തന്റെ അനുമതിയില്ലാതെ സംസ്ഥാനത്തെ 25 സർവകലാശാലകളിലെ വൈസ് ചാൻസലർമാരെ തീരുമാനിച്ചെന്ന് ഗവർണർ ധൻഖർ പരാതിപ്പെട്ടിരുന്നു. സെർച്ച് കമ്മിറ്റി തിരഞ്ഞെടുക്കുന്ന വൈസ് ചാൻസലർമാരുടെ പേരുകൾ ഗവർണർ അംഗീകരിക്കണമെന്നും അതല്ലെങ്കിൽ ആ തീരുമാനവുമായി മുന്നോട്ടുപോകാൻ വിദ്യാഭ്യാസ വകുപ്പിന് അധികാരമുണ്ടെന്നുമാണ് ബംഗാൾ സർക്കാരിന്റെ പുതിയ തീരുമാനം. ഇതോടെ ഗവർണറെ നോക്കുകുത്തിയാക്കി സെർച്ച് കമ്മിറ്റിയുടെ തീരുമാനവുമായി സർക്കാരിന് മുന്നോട്ടുപോകാനാകും.
സർക്കാർ തീരുമാനത്തിനെതിരേ ബി.ജെ.പി രംഗത്തു വന്നു. എല്ലാ അധികാരവും കൈക്കുള്ളിലാക്കാനാണ് മുഖ്യമന്ത്രി മമതാ ബാനർജി ശ്രമിക്കുന്നതെന്ന് ചെയ്തികൾ ആരും ചോദ്യം ചെയ്യരുതെന്നാണ് അവർ കരുതുന്നതെന്നും മുതിർന്ന ബി.ജെ.പി വക്താവ് സമിക് ഭട്ടാചാര്യ പറഞ്ഞു. എന്നാൽ ഗവർണർ ഭരണഘടനാ പദവി ആസ്വദിക്കുകയും ബി.ജെ.പി ഏജന്റായി പ്രവർത്തിക്കുകയുമാണെന്ന് തൃണമൂൽ കോൺഗ്രസ് സംസ്ഥാന ജനറൽ സെക്രട്ടറി കുനാൽ ഘോഷ് പറഞ്ഞു.

2019 ജൂലൈയിലാണ് ധൻഖാർ ബംഗാൾ ഗവർണറായി ചുമതലയേറ്റെടുത്തത്. ഫെബ്രുവരി 2020 ൽ സർവകലാശാല ബിരുദദാന ചടങ്ങിനെ കുറിച്ച് തന്നെ അറിയിച്ചില്ലെന്നാരോപിച്ച് ധൻഖാർ കൂച്ച് ബിഹാർ പഞ്ചനൻ ബർമ സർവകലാശാല വി.സി ദേബ്കുമാർ മുഖോപാധ്യായക്ക് കാരണം കാണിക്കൽ നോട്ടിസ് നൽകിയിരുന്നു. സർക്കാരുമായി ഏറ്റുമുട്ടൽ തുടങ്ങിയതോടെ 2020 ജൂലൈയിൽ 20 സർവകലാശാലകളുടെ വി.സിമാർ ഗവർണർ വിളിച്ച വെർച്വൽ യോഗം ബഹിഷ്‌കരിച്ചിരുന്നു.

കേരളത്തിലും തമിഴ്‌നാട്ടിലും അതത് ഗവർണർമാരുടെ നിലപാടുകളെ സർക്കാരുകൾ ചോദ്യം ചെയ്തിരുന്നു. ഭരണഘടനാപരമായ മറ്റ് ചുമതലകൾ നിർവഹിക്കുന്ന ആളായതിനാൽ ചാൻസലർ പദവി കൂടി ഗവർണർ ആരിഫ് മുഹമ്മദ് ഖാന് നൽകേണ്ടതില്ലെന്ന് രണ്ടാം പിണറായി സർക്കാർ കേന്ദ്രത്തിന് ശുപാർശ നൽകിയിരുന്നു. കണ്ണൂർ, കാലടി സർവകലാശാലയിലെ ഇടപെടലിൽ അതൃപ്തി അറിയിച്ച് തനിക്ക് ചാൻസലർ പദവി വേണ്ടെന്ന് ഒരു ഘട്ടത്തിൽ കേരള ഗവർണർ ആരിഫ് മുഹമ്മദ് ഖാൻ തുറന്നടിച്ചിരുന്നു.