തിരുവനന്തപുരം: കൊടകര കുഴല്‍പ്പണ കേസില്‍ ബി.ജെ.പി സംസ്ഥാന നേതാക്കളുടെ മൊഴി തള്ളി അന്വേഷണ സംഘം. പരാതിക്കാരനായ ധര്‍മ്മരാജന് ബി.ജെ.പിയുടെ തെരഞ്ഞെടുപ്പ് ചുമതല ഉണ്ടായിരുന്നില്ലെന്നാണ് അന്വേഷണ സംഘത്തിന്റെ കണ്ടെത്തല്‍. ധര്‍മ്മരാജനെ ഫോണില്‍ ബന്ധപ്പെട്ടത് സംഘടനാ കാര്യങ്ങള്‍ സംസാരിക്കാനാണെന്നായിരുന്നു സംഘടന ജനറല്‍ സെക്രട്ടറി എം.ഗണേഷിന്റെ മൊഴി.

ധര്‍മരാജനുമായുള്ള ബന്ധത്തെക്കുറിച്ചും പണം കവര്‍ച്ച ചെയ്ത ശേഷമുള്ള ഫോണ്‍കോളുകളെക്കുറിച്ചുമായിരുന്നു പ്രധാനമായും ഗണേഷിനോട് ചോദ്യം ചെയ്യലിനിടെ ആരാഞ്ഞത്. ധര്‍മരാജനെ അറിയാമെന്നും പണത്തെക്കുറിച്ച് സംസാരിച്ചിട്ടില്ലെന്നുമായിരുന്നു ഗണേഷിന്റെ മൊഴി.

തെരഞ്ഞെടുപ്പ് സാമഗ്രികളുടെ വിതരണത്തിന്റെ ചുമതല ധര്‍മ്മരാജനെ ഏല്‍പ്പിച്ചിരുന്നു. ഇതേ കുറിച്ച് സംസാരിക്കാനാണ് വിളിച്ചതെന്നും ഗണേഷ് മൊഴി നല്‍കിയിരുന്നു. എന്നാല്‍ ഇത് വാസ്തവ വിരുദ്ധമാണെന്നാണ് അന്വേഷണ സംഘത്തിന്റെ കണ്ടെത്തല്‍. ഇതോടെ ബി.ജെ.പി കൂടുതല്‍ പ്രതിരോധത്തിലായിരിക്കുകയാണ്.

കവര്‍ച്ചയുണ്ടായ ദിവസവും തുടര്‍ദിവസങ്ങളിലും ധര്‍മ്മരാജെന ഫോണില്‍ ബന്ധപ്പെട്ടവരുടെയും പട്ടിക പൊലിസ് തയ്യാറാക്കി വരികയാണ്. ബി.ജെ.പിയിലെ ഏറ്റവും പ്രമുഖനായ നേതാവും ധര്‍മരാജനും 3,4 ദിവസങ്ങളില്‍ 22 തവണ ഫോണില്‍ ബന്ധപ്പെട്ടിരുന്നതായും കണ്ടെത്തിയിട്ടുണ്ട്.