തിരുവനന്തപുരം: വന്ദേ ഭാരത് ട്രെയിനിന്റെ ഫ്‌ളാഗ് ഓഫിനെ കുറിച്ച് ഔദ്യോഗിക അറിയിപ്പ് കിട്ടിയിട്ടില്ലെന്ന് സംസ്ഥാന സര്‍ക്കാര്‍. ഇതുവരെ ഔദ്യോഗിക അറിയിപ്പ് ലഭിച്ചിട്ടില്ലെന്നും അറിയിപ്പ് ലഭിച്ചിച്ച ശേഷം പ്രതികരിക്കാമെന്നും മന്ത്രി വി.അബ്ദുറഹിമാന്‍ പ്രതികരിച്ചു. എന്നാല്‍, കേരളത്തിനുള്ള വിഷുക്കൈനീട്ടമാണ് വന്ദേഭാരത് എന്നാണ് ബിജെപിയുടെ പ്രതികരണം.

അതേ സമയം വന്ദേ ഭാരതിനെ രാഷ്ട്രീയമായി ഉപയോഗിക്കാനാണ് ബി.ജെ.പി ശ്രമിക്കുന്നത്. സില്‍വര്‍ ലൈനിന് തടസ്സം നിന്നതോടെ വന്ദേഭാരത് എങ്കിലും വേണമെന്ന നിലപാടിലായിരുന്നു സംസ്ഥാന സര്‍ക്കാര്‍. എന്നാല്‍ സര്‍ക്കാരിനെ അറിയിക്കാതെ ഫഌഗ് ഓഫിന് ഒരുങ്ങിയ വിഷയത്തില്‍ അതൃപ്തിയുണ്ട്. പ്രതികരണം പുറത്തുവന്നിട്ടില്ലെങ്കിലും കരുതലോടെ കൈകാര്യം ചെയ്യാനാണ് സി.പി.എം ഒരുങ്ങുന്നത്.

കെ.റെയിലിന് തുരങ്കംവെച്ച കേന്ദ്ര സര്‍ക്കാര്‍ വികസന വിരുദ്ധരാണെന്ന പ്രചാരണമായിരുന്നു എല്‍.ഡി.എഫ് നടത്തിയിരുന്നത്. എന്നാല്‍ വന്ദേഭാരത് വഴി അത്തരം പ്രചാരണങ്ങള്‍ക്ക് തടയിടാമെന്നാണ് ബി.ജെ.പിയുടെ കണക്കു കൂട്ടല്‍. സില്‍വര്‍ലൈനിനെ ശക്തമായി എതിര്‍ത്ത യു.ഡി.എഫും കരുതലോടെയാണ് വന്ദേ ഭാരതിന്റെ വരവിനെ കാണുന്നത്. കണ്ണൂരിനപ്പുറം മംഗലാപുരം വരെ നീട്ടണമെന്ന ആവശ്യം മുന്നോട്ട് വെക്കുന്ന യുഡിഎഫ് വന്ദേഭാരത് വഴിയുള്ള ബി.ജെ.പിയുടെ രാഷ്ട്രീയനീക്കങ്ങളെ എതിര്‍ക്കുന്നു.