ഹൈദരാബാദ്: ഒളിംപിക്‌സ് ബാഡ്മിന്റണില്‍ വെള്ളി മെഡല്‍ നേടി റിയോയില്‍ നിന്നു തിരിച്ചെത്തിയ പി.വി. സിന്ധുവിന് ഹൈദരാബാദില്‍ ഉജ്ജ്വല സ്വീകരണം. ഇന്നലെ രാവിലെ ഹൈദരാബാദിലെ രാജീവ് ഗാന്ധി വിമാനത്താവളത്തില്‍ വന്നിറങ്ങിയ സിന്ധുവിനും പരിശീലകന്‍ പുല്ലേല ഗോപിചന്ദിനും തെലങ്കാന സര്‍ക്കാരാണ് സ്വീകരണം നല്‍കിയത്.

കായിക താരങ്ങളും രാഷ്ട്രീയ പ്രമുഖരും നൂറുകണക്കിനു ജനങ്ങളും രാജ്യത്തിന് അഭിമാനമായ താരത്തെ സ്വീകരിക്കാന്‍ വിമാനത്താവളത്തില്‍ എത്തി.

ഇരുവരേയും അലങ്കരിച്ച വാഹനത്തില്‍ ജി.എം.സി ബാലയോഗി സ്റ്റേഡിയത്തിലേക്ക് ആനയിച്ചു. സ്റ്റേഡിയത്തില്‍ തെലങ്കാനയും ആന്ധ്രപ്രദേശും ചേര്‍ന്ന് വമ്പിച്ച സ്വീകരണമാണ് ഒരുക്കിയത്.

മെഡല്‍ നേടിയതിനു പിന്നാലെ സിന്ധുവിനു തെലങ്കാന സര്‍ക്കാര്‍ ഒരു കോടി രൂപ പാരിതോഷികം പ്രഖ്യാപിച്ചിരുന്നു. കൂടാതെ ഭൂമിയും നല്‍കാന്‍ പദ്ധതിയുണ്ട്.