കോട്ടയം: യു.ഡി.എഫ് വിടാനുള്ള കാരണങ്ങള്‍ നിരത്തി കേരളാ കോണ്‍ഗ്രസ്(എം) മുഖപത്രമായ 'പ്രതിഛായ' വീണ്ടും കോണ്‍ഗ്രസിനെതിരേ. യു.ഡി.എഫ്. ചെയര്‍മാനെ തെരഞ്ഞെടുക്കുന്ന അവസരത്തില്‍ പാര്‍ട്ടിയോട് ആലോചിച്ചില്ലെന്നും കോണ്‍ഗ്രസെടുത്ത തീരുമാനങ്ങള്‍ മറ്റുള്ളവരുടെ മേല്‍ അടിച്ചേല്‍പ്പിച്ചു എന്നതുമുള്‍പ്പെടെയുള്ള ആരോപണങ്ങളാണ് 'പ്രതിഛായ'യുടെ പുതിയ ലക്കത്തിലെ വിമര്‍ശനങ്ങള്‍. തെരഞ്ഞെടുപ്പില്‍ ഉമ്മന്‍ചാണ്ടി ഭരണം തുടരാന്‍ ആഗ്രഹിച്ചപ്പോള്‍ രമേശ് ചെന്നിത്തല പ്രതിപക്ഷ നേതാവാകാന്‍ കൊതിക്കുകയും ആദര്‍ശത്തിന്റെ ആള്‍രൂപമാകാന്‍ സുധീരന്‍ പതിവു നാടകരചന നടത്തുകയുമായിരുന്നുവെന്നും വിമര്‍ശനമുണ്ട്. ഘടകകക്ഷികള്‍ സീറ്റു വിഭജനം അറിഞ്ഞതു മാധ്യമങ്ങളിലൂടെയാണ്.

കേരളാ കോണ്‍ഗ്രസിനു നല്‍കിയ മുഴുവന്‍ സീറ്റുകളിലും കോണ്‍ഗ്രസ് ഒളിഞ്ഞും തെളിഞ്ഞും കാലുവാരാന്‍ ശ്രമിച്ചു. തിരുവല്ലയില്‍ പാര്‍ട്ടി സ്ഥാനാര്‍ഥിയെ 14 ദിവസം ബന്ദിയാക്കി പരസ്യവിചാരണ നടത്തുക പോലുമുണ്ടായി. ബാറുടമ ബിജു രമേശിന്റെ മകളുടെ വിവാഹനിശ്ചയ ചടങ്ങില്‍ ഉമ്മന്‍ചാണ്ടിയും ചെന്നിത്തലയും ഉള്‍പ്പെടെയുള്ളവര്‍ പങ്കെടുത്തത് കേരളാ കോണ്‍ഗ്രസിനെ സംബന്ധിച്ചിടത്തോളം ആക്ഷേപകരമായി.
തദ്ദേശ തെരഞ്ഞെടുപ്പില്‍ കാസര്‍കോട് മുതല്‍ പാറശാല വരെ റിബലുകളെ നിര്‍ത്തിയും കാലുവാരിയും കോണ്‍ഗ്രസ് 'ഐക്യത്തോടെ' പ്രവര്‍ത്തിച്ചു. ചരല്‍ക്കുന്ന് ക്യാംപില്‍ പാര്‍ട്ടി വയനാട് ജില്ലാ പ്രസിഡന്റ് കെ.ജെ.ദേവസ്യ രാഷ്ട്രീയ ചര്‍ച്ചയില്‍ അവതരിപ്പിച്ച പ്രമേയമാണ് ലേഖനരൂപത്തില്‍ പ്രസിദ്ധീകരിച്ചത്.