തിരുവനന്തപുരം
സർക്കാരിനെതിരേ ഉന്നയിച്ച അടിസ്ഥാനമില്ലാത്ത ആരോപണങ്ങൾ ചീട്ടുകൊട്ടാരം പോലെ തകരുകയാണെന്ന് മുഖ്യമന്ത്രി പിണറായി വിജയൻ. പ്രത്യേക ലക്ഷ്യങ്ങളിലൂടെ ഭരണ നേതൃത്വത്തിനെതിരേ ആരോപണം ഉന്നയിക്കുമ്പോൾ അത് അന്വേഷിക്കും. ഡോളർകടത്തും ഇടനിലക്കാർ എന്നതും ഭാവനാസൃഷ്ടിയാണ്. സ്വർണക്കടത്തു കേസിലെ പ്രതി എന്തു പറയണം എന്ന് തീരുമാനിക്കുന്നത് ബി.ജെ.പിയാണ്.
അവരെ സഹായിക്കുന്ന സ്ഥിതിയാണ് പ്രതിപക്ഷത്തിന്റെത്. സർക്കാർ താഴേപോകുമെന്ന് വെറുതെ കരുതേണ്ടെന്നും മുഖ്യമന്ത്രി അടിയന്തര പ്രമേയ ചർച്ചയ്ക്കുള്ള മറുപടിയിൽ പറഞ്ഞു. സോളാർ കേസും സ്വർണക്കടത്തും തമ്മിൽ എങ്ങനെ ബന്ധപ്പെടുത്താനാകും. സോളാർ അന്വേഷണത്തിൽ ഒത്തുകളി ആരോപണം ഉയർന്നപ്പോൾ ആണ് കേസ് സി.ബി.ഐ അന്വേഷണത്തിന് വിട്ടത്. പരാതിക്കാരിയും ഇക്കാര്യം ആവശ്യപ്പെട്ടു. അനാവശ്യമായ പഴി സംസ്ഥാന സർക്കാർ കേൾക്കേണ്ട എന്നു കരുതിയാണ് അത് അംഗീകരിച്ചത്. സ്വപ്ന രഹസ്യമൊഴി ആദ്യമായല്ല കൊടുക്കുന്നത്. മൊഴി അന്വേഷിച്ച കസ്റ്റംസ് പുതുതായിട്ട് ഒന്നുമില്ലെന്നാണ് സ്റ്റേറ്റ്‌മെന്റ് നൽകിയതെന്നും മുഖ്യമന്ത്രി പറഞ്ഞു.