പാപ്പിനിശ്ശേരി: ജനങ്ങളുടെ സഞ്ചാരത്തിന് ഭീഷണിയായി പാപ്പിനിശ്ശേരിയില്‍ തെരുവുനായ ശല്യം രൂക്ഷം. വളപട്ടണം പാലത്തിനു സമീപം, പഴയങ്ങാടി ജങ്ഷന്‍, പാപ്പിനിശ്ശേരി ചുങ്കം ദേശീയപാതയോരം വരെയുള്ള സ്ഥലങ്ങള്‍ തെരുവുനായ്ക്കളുടെ വിഹാര കേന്ദ്രമായി മാറി. പഴയങ്ങാടി ജങ്ഷന്‍ ദേശീയ പാതയോരത്ത് റോഡിനിരുവശത്തായി വളര്‍ന്ന കാടുകള്‍ക്കിടയില്‍ മാലിന്യം നിക്ഷേപിക്കുന്നതാണ് നായകളുടെ വര്‍ധനവിനു കാരണം. അറവു മാലിന്യമടക്കമുള്ളവ ചാക്കില്‍ കെട്ടി തള്ളുന്നതിനാല്‍ നായകള്‍ക്ക് ഭക്ഷണത്തിനായി വേറെങ്ങും അലയേണ്ടി വരുന്നില്ല.
മാലിന്യ ഭക്ഷണം കഴിച്ച് കണ്ടല്‍കാടുകളിലും പാതയോരത്തുമായാണ് ഇവയുടെ വിശ്രമവും. റെയില്‍വേഗേറ്റ് മേല്‍പ്പാല നിര്‍മാണം നടക്കുന്നതിനാല്‍ നിരവധി യാത്രക്കാരാണ് ഇതുവഴി നടന്നു പോകുന്നത്. രാത്രികാലങ്ങളില്‍ സമീപ പ്രദേശത്തെ വീടുകളില്‍ കൂട്ടമായെത്തുന്ന നായ്ക്കള്‍ വീട്ടുകാരുടെ ഉറക്കം കെടുത്തുകയും ശല്യമുണ്ടാക്കുകയും ചെയ്യുന്നതിനു പുറമേ വളര്‍ത്തുമൃഗങ്ങളെ അക്രമിക്കുന്നതും പതിവാണ്.
മാലിന്യകേന്ദ്രമായ പാതയോരത്തെ കാടുകള്‍ വെട്ടിത്തെളിക്കുക, ആവശ്യത്തിന് തെരുവു വിളക്കുകള്‍, കാമറകള്‍ സ്ഥാപിക്കുക എന്നിവ അധികൃതര്‍ നടപ്പാക്കിയാലേ ഈ ദുരിതത്തില്‍ നിന്നു നാട്ടുകാരെ കരകയറ്റാന്‍ പറ്റൂ.