ചങ്ങരംകുളം: നറുക്കെടുപ്പില്‍ ലഭിച്ച മൊബൈല്‍ ഫോണിനായി വിലാസം നല്‍കിയ യുവാവിന് കിട്ടിയത് തകിട് കഷ്ണങ്ങള്‍. ചങ്ങരംകുളം മാട്ടത്തില്‍ താമസിക്കുന്ന മന്‍സൂറാണ് തട്ടിപ്പിനിരയായത്. ഒപ്പം 3,500 രൂപയും നഷ്ടമായി.

ഏതാനും ദിവസംമുമ്പ് കേരളത്തിലെ 100 പേര്‍ക്ക് സോണി എക്‌സ്പീരിയ സീരീസിലുള്ള 29,000 രൂപ വിലവരുന്ന മൊബൈല്‍ ഫോണ്‍ അടിച്ചിട്ടുണ്ടെന്നും പോസ്റ്റോഫിസില്‍ ചെന്ന് വാങ്ങണമെന്നും ഫോണില്‍ മെസേജ് വന്നിരുന്നു. മെസേജ് ഒരുപാടുതവണ വന്നപ്പോള്‍ മന്‍സൂര്‍ പോസ്റ്റല്‍ അഡ്രസ് അയച്ചു കൊടുക്കുകയായിരുന്നു. കഴിഞ്ഞദിവസം പോസ്റ്റോഫിസില്‍ ചെന്ന് പോസ്റ്റല്‍ ചാര്‍ജ് എന്ന പേരില്‍ 3,500 രൂപ അടച്ച് സമ്മാനപ്പൊതി വാങ്ങിക്കുകയായിരുന്നു.

പൊതി പൊട്ടിച്ചുനോക്കിയ മന്‍സൂറിന് ലഭിച്ചത് പ്രമുഖ ചാനലില്‍ രക്ഷാകവചം എന്ന പേരില്‍ പരസ്യം കാണിക്കുന്ന ഏതാനും തകിട് കഷ്ണങ്ങളും ഏലസും ആണ്. തുടര്‍ന്ന് പൊലിസില്‍ പരാതി കൊടുക്കാന്‍ ഒരുങ്ങുകയാണ് മന്‍സൂര്‍.