പത്തനംതിട്ട • ചൂടും വായു മലിനീകരണവും കൂടുതലുള്ള ദിവസങ്ങളിൽ നായകൾ മനുഷ്യരെ കടിക്കാനുള്ള സാധ്യത കൂടുതലെന്ന് പഠനം. പാരിസ്ഥിതിക ഘടകങ്ങളും നായകളിലെ ആക്രമണ സാധ്യതകളെയും കുറിച്ച് നടത്തിയ സമഗ്ര പഠനമാണ് ശാസ്ത്രജ്ഞർ നടത്തിയത്. സയന്റിഫിക് റിപ്പോർട്ട് ജേർണൽ എന്ന ശാസ്ത്ര പ്രസിദ്ധീകരണത്തിലൂടെയാണ് പഠന ഫലങ്ങൾ പുറത്ത് വന്നത്.
കാലാവസ്ഥയും,വായു മലിനീകരണവും നായകളിൽ മനുഷ്യനെ ആക്രമിക്കാനുള്ള ഘടകങ്ങളായി പ്രവർത്തിക്കുന്നുണ്ടോ എന്നതായിരുന്നു ഗവേഷകർ പ്രധാനമായും പരിശോധിച്ചത്. ചൂട്, വെയിൽ, വായുമലിനീകരണം എന്നിവ കൂടുതലുള്ള സമയങ്ങളിൽ നായകളുടെ ആക്രമണ സാധ്യത 11 ശതമാനത്തോളം ഉയരുമെന്നാണ് ഗവേഷകരുടെ കണ്ടെത്തൽ.

. മനുഷ്യനും നായകളും തമ്മിലുള്ള സമ്പർക്കത്തിൽ നായകൾക്ക് ശത്രുതാ സ്വഭാവം കൈവരിക്കാനുള്ള സാധ്യത ഏറുന്നത് ചൂട്, വെയിൽ അതുമല്ലെങ്കിൽ മൂടൽ മഞ്ഞുള്ള കാലാവസ്ഥയിൽ ആയിരിക്കുമെന്നാണ് സയന്റിഫിക് റിപ്പോർട്ട് ജേർണലിൽ പറയുന്നത്. അൾട്രാ വയലറ്റ് കിരണങ്ങളുടെ അളവ് കൂടിയ ദിവസങ്ങളിൽ 11 ശതമാനവും, ചൂട് കൂടിയ ദിവസങ്ങളിൽ 4 ശതമാനവും, ഓസോൺ അളവ് കൂടുതലുളള ദിവസങ്ങളിൽ 3 ശതമാനവുമാണ് നായകൾ മനുഷ്യരെ കടിക്കുന്ന സംഭവങ്ങൾ റിപ്പോർട്ട് ചെയ്തിരിക്കുന്നത്.
എന്നാൽ മഴയുള്ള ദിവസങ്ങളിൽ നായ മനുഷ്യരെ കടിക്കുന്നത് ഒരു ശതമാനത്തോളം കുറയുന്നതായാണ് കണക്കുകൾ. മാത്രമല്ല അന്തരീക്ഷ മലിനീകരണം വർധിപ്പിക്കുന്ന കണങ്ങളുടെ സാന്നിധ്യമുണ്ടെങ്കിലും നായകൾ ഉപദ്രവകാരികളാകുമെന്നാണ് പഠനത്തിലൂടെ ശാസ്ത്രഞ്ജർ കണ്ടെത്തിയത്.

നായകളുടെ ഇനം, ലൈംഗികത, വന്ധ്യംകരണത്തിന് വിധേയമായോ, ഇല്ലയോ തുടങ്ങിയവ പഠനത്തിൽ ഉൾപ്പെടുത്തിയിട്ടില്ല. കടിയേറ്റയാൾക്ക് നായയുമായുള്ള മുൻപരിചയം, തമ്മിലുള്ള ഇടപെടലുകൾ തുടങ്ങിയവയും ഈ പഠനത്തിന് വിധേയമാക്കിയിട്ടില്ല.അമേരിക്കയിലെ ഹാർവാർഡ് മെഡിക്കൽ സ്കൂളിലെ ക്ലാസ് ലിൻ മാനും സഹപ്രവർത്തകരും ചേർന്നാണ് ഗവേഷണത്തിന് മുൻകൈ എടുത്തത്. ഡാലസ്, ഹൂസ്റ്റൺ, ബാൾട്ടിമോർ, ബാറ്റൺ റൂജ്, ചിക്കാഗോ, ലൂയിസ് വില്ലെ, ലോസ് ഏഞ്ചൽസ്, ന്യൂ യോർക്ക് സിറ്റി തുടങ്ങിയ യു.എസിലെ എട്ട് പ്രധാന പട്ടണങ്ങളിൽ 2009 മുതൽ 2018 വരെയായിരുന്നു ഗവേഷണ കാലയളവ്.

Content Highlights: Dogs became agrassive in hot and air polluted situvations