60 വര്‍ഷം മദ്‌റസയില്‍ സേവനം ചെയ്ത പ്രിയ ഉസ്താദിന്റെ കുടുംബത്തിന് പെന്‍ഷന്‍ നല്‍കി ഒരു നാട്

കൊടുവള്ളി: നാട്ടിലെ നാലു തലമുറകള്‍ക്ക് മതപരമായ അറിവ് പകര്‍ന്ന ഉസ്താദിന്റെ കുടുംബത്തിന് മാസം തോറും പെന്‍ഷന്‍ നല്‍കാന്‍ തീരുമാനിച്ച് ഒരു നാട്. കോഴിക്കോട് ജില്ലയിലെ കൊടുവള്ളി പന്നൂര്‍ മഹല്ലിലെ നാട്ടുകാരാണ് 60 വര്‍ഷം തങ്ങളുടെ മദ്‌റസയില്‍ തുടര്‍ച്ചയായി അധ്യാപനം നടത്തി മരണപ്പെട്ട ഉസ്താദിന്റെ കുടുംബത്തിന് 2500 രൂപ വീതം എല്ലാ മാസവും നല്‍കാന്‍ തീരുമാനിച്ചത്. ഉസ്താദിന്റെ ശിഷ്യരായി നാട്ടിലും പ്രവാസ ലോകത്തുമുള്ളവര്‍ ഒരോ മാസത്തേയും പെന്‍ഷന്‍ സംഖ്യ നല്‍കാനാണ് തീരുമാനം. നരിക്കുനി റെഞ്ചേിലെ പന്നൂര്‍ അന്‍വാറുല്‍ ഇസ്ലാം മദ്‌റസയില്‍ 60 വര്‍ഷം മുഅല്ലിമായി സേവനം ചെയ്ത വി അബ്ദുല്ല മുസ്ലിയാരുടെ കുടുംബത്തിനാണ് പെന്‍ഷന്‍ നല്‍കുക.

ഈ നാട്ടിലെ നാലു തമുറയിലെ ഭൂരിപക്ഷം പേരും അബ്ദുല്ല മുസ്ലിയാരില്‍ നിന്ന് അറിവ് നേടിയവരാണ്. തൊട്ടടുത്ത പ്രദേശത്തുകരനായിരുന്നുവെങ്കിലും മുഴുസമയവും ഈ നാട്ടില്‍ തന്നെയായിരുന്നു അദ്ദേഹം. നാട്ടിലെ മരണാനന്തര ചടങ്ങുകള്‍ക്കെല്ലാം ജീവിത കാലത്ത് അദ്ദേഹം മാത്രമായിരുന്നു നേതൃത്വം വഹിച്ചിരുന്നത്. വര്‍ഷങ്ങളോളം മദ്‌റസയില്‍ സദറായാണ് അദ്ദേഹം സേവനം ചെയ്തത്. നിരവധി തവണ പൊതുപരീക്ഷയിലെ മികച്ച വിജയത്തിനുള്ള സമസ്തയുടെ ഉപഹാരം അബ്ദുല്ല മുസ്ലിയാരേയും അന്‍വാറുല്‍ ഇസ്ലാം മദ്‌റസയേയും തേടിവന്നിരുന്നു. അബ്ലുല്ല മുസ്ലിയാരുടെ പൊതുപരീക്ഷ ക്ലാസില്‍ പരാജയമെന്ന ചിന്ത പോലുമുണ്ടായിരുന്നില്ല. ഒഴിവു സമയങ്ങളിലെല്ലാം സ്‌പെഷ്യല്‍ ക്ലാസ് പോലും എടുത്തു നൂറു ശതമാനം വിജയമെന്ന നേട്ടം നിരവധി തവണയാണ് കരസ്ഥമാക്കിയത്.

85 വര്‍ഷത്തെ തന്റെ ജീവിതത്തിലെ 60 വര്‍ഷം പന്നൂരില്‍ സേവനം ചെയ്ത മുസ്ലിയാര്‍ 25 വര്‍ഷം പന്നൂര്‍ പള്ളിയില്‍ തന്നെയാണ് മത പഠനവും നടത്തിയത്. കഴിഞ്ഞ ദിവസം പന്നൂരിലെ ഉസ്താദിന്റെ കര്‍മ്മ ഭൂമിയായ മദ്‌റസയില്‍ നടന്ന അനുസ്മരണ ചടങ്ങില്‍ വെച്ചാണ് പാണക്കാട് സയ്യിദ് മുഈനലി തങ്ങളാണ് വി. അബ്ദുല്ല മുസ്ലിയാര്‍ ഫൗണ്ടേഷന്‍ (വഫ) എന്ന സംഘടന രൂപീകരിച്ചതും പെന്‍ഷന്‍ പ്രഖ്യാപനം നടത്തിയതും. ഇതിനായി രൂപീകരിച്ച കമ്മറ്റി ഭാരവാഹികള്‍.ഷമീം പന്നൂര്‍ (പ്രസിഡന്റ് )ഷഫീഖ് ദാരിമി, അമീന്‍ അശ്അരി (വൈസ് പ്രസി)
അബ്ദുന്നാസര്‍ സി എം (ജന. സെക്രട്ടറി )സുബൈര്‍ ഇ കെ, ജാസിം ഇ കെ (സെക്രട്ടറി)സ്വാദിഖ് കേളോത്ത് (ട്രഷറര്‍ )അബ്ദുറസാഖ് ഒതയോത്ത്, അഷ്‌റഫ് വി പി, റിയാസ് വി പി, ഫാറൂഖ് ആര്‍ കെ (മെമ്പര്‍).