കൊച്ചി: ഏക സിവില്‍ കോഡുമായി ബന്ധപ്പെട്ട ചര്‍ച്ചകളില്‍ പ്രതികരണവുമായി കേരള കത്തോലിക്കാസഭ. കരട് രൂപം തയ്യാറാക്കുകയോ പുറത്തുവിടുകയോ ചെയ്തിട്ടില്ലാത്തതിനാല്‍ ഏക സിവില്‍ കോഡിന്റെ സ്വഭാവം എന്തായിരിക്കുമെന്നതില്‍ വ്യക്തയില്ല. അതിനാല്‍ ഭരണഘടന ഉറപ്പുനല്‍കുന്ന മതസ്വാതന്ത്ര്യത്തെ ഏതുവിധത്തിലാണ് ബാധിക്കുകയെന്നതില്‍ അവ്യക്തതയുണ്ടെന്ന് കെ.സി.ബി.സി. വാര്‍ത്താക്കുറിപ്പില്‍ പറഞ്ഞു. ഇന്ത്യന്‍ ജനതയുടെ വൈവിധ്യങ്ങളുടെ പശ്ചാത്തലത്തില്‍ ഏക സിവില്‍ കോഡ് എന്ന ആശയം അപ്രായോഗികവും അസാധ്യവുമാണ്. വിഷയം പരിഗണനയ്‌ക്കെടുക്കാനുള്ള സമയം ആയിട്ടില്ലെന്ന നിലപാടാണ് സഭയ്‌ക്കെന്നും വാര്‍ത്താക്കുറിപ്പില്‍ വ്യക്തമാക്കുന്നു.

പഠനത്തിന് കൂടുതല്‍ സമയം ആവശ്യമുള്ള വിഷയമായതിനാല്‍, അഭിപ്രായം സമര്‍പ്പിക്കാന്‍ പരിമിതമായ സമയം മാത്രം നല്‍കിയിരിക്കുന്ന നടപടി സന്ദേഹമുണ്ടാക്കുന്നു. നിയമം വന്നാല്‍, അതുവഴി മതസ്വാതന്ത്ര്യം ഹനിക്കപ്പെടാനും, പരമ്പരാഗതമായ ആചാരാനുഷ്ഠാനങ്ങള്‍ ചവിട്ടി മെതിക്കപ്പെടാനുമുള്ള സാധ്യതകളുള്ളത് ആശങ്കാജനകമാണെന്നും കെ.സി.ബി.സി. വ്യക്തമാക്കുന്നു.

ക്രൈസ്തവ വിശ്വാസികള്‍ ഉള്‍പ്പെടെയുള്ള പട്ടികവര്‍ഗ്ഗക്കാരുടെ മതപരവും സാംസ്‌കാരികവുമായ ആശങ്കകളെ ശ്രദ്ധാപൂര്‍വ്വം പരിഗണിച്ചുകൊണ്ടായിരിക്കണം സിവില്‍ കോഡ് നടപ്പാക്കേണ്ടത്. വിവിധ ജനവിഭാഗങ്ങളുടെ ആരാധനാ സ്വാതന്ത്ര്യത്തെയും മതസ്വാതന്ത്ര്യത്തെയും തടസപ്പെടുത്തുകയോ തകര്‍ക്കുകയോ ചെയ്യുന്നതാവരുത്. വിവേചനങ്ങളുടേയോ ലിംഗ അനീതിയുടെയോ പേരില്‍ മതപരവും സാംസ്‌കാരികവുമായ വിഷയങ്ങളില്‍ വ്യക്തിനിയമങ്ങളുടെ മറവില്‍ സര്‍ക്കാര്‍ കൈകടത്തരുത്. ന്യൂനപക്ഷ സമുദായങ്ങള്‍ എന്നനിലയില്‍ വിവിധ മതവിഭാഗങ്ങളുടെ ഉള്‍ഭരണ സ്വാതന്ത്ര്യവും പൈതൃകവും സംരക്ഷിക്കുന്നതില്‍ കേന്ദ്രസര്‍ക്കാര്‍ ശ്രദ്ധ പുലര്‍ത്തേണ്ടതുണ്ട്. നിയമനിര്‍മ്മാണങ്ങളും പരിഷ്‌കാരങ്ങളും ഏതെങ്കിലും മത ന്യൂനപക്ഷ വിഭാഗങ്ങളില്‍ അസ്വസ്ഥതകള്‍ക്ക് കാരണമായിക്കൂടെന്നും കത്തോലിക്കാസഭ വാര്‍ത്താക്കുറിപ്പില്‍ വ്യക്തമാക്കുന്നു.

Content Highlights:uniform civil code is inapplicable kcbc