ക്രെഡിറ്റ് കാര്‍ഡ് ഉപയോഗിക്കുന്നവരാണോ?

ക്രെഡിറ്റ് കാര്‍ഡ് ഉപയോഗിക്കുന്നവരാണോ നിങ്ങള്‍. എങ്കില്‍ ചില കാര്യങ്ങള്‍ നിര്‍ബന്ധമായും ശ്രദ്ധിക്കേണ്ടതുണ്ട്. ഓണ്‍ലൈന്‍ തട്ടിപ്പിനരയായ വാര്‍ത്തകള്‍ നിരന്തരം മാധ്യമങ്ങളില്‍ നിറയുകയാണ്. കഴിഞ്ഞ ദിവസം ഗുജറാത്ത് സിഐഡി ക്രൈം ഡിപ്പാര്‍ട്ട്‌മെന്റ് പുറത്തു വിട്ട കണക്കുകള്‍ പ്രകാരം ഗുജറാത്തിലുള്ള 14,000 ല്‍ അധികം ആളുകള്‍, ഓണ്‍ലൈന്‍ കാര്‍ഡ് തട്ടിപ്പുകളുടെ ഇരകളായതായി വ്യക്തമാക്കുന്നു.

ക്രെഡിറ്റ് കാര്‍ഡ് തട്ടിപ്പുകള്‍ തടയാനുള്ള മാര്‍ഗങ്ങള്‍

• സീറോ ലയബിലിറ്റി പ്രൊട്ടക്ഷന്‍ കാര്‍ഡുകള്‍ തെരഞ്ഞെടുക്കുക. ഇവയിലൂടെയുള്ള അണ്‍ ഓതറൈസ്ഡ് വിനിമയങ്ങള്‍ക്ക് കാര്‍ഡ് ഉടമ നിയമപരമായി ഉത്തരവാദിയായിരിക്കില്ല. പ്രധാന ക്രെഡിറ്റ് കാര്‍ഡുകളിലെല്ലാം ഈ സേവനം ലഭ്യമാണ്. ചില കാര്‍ഡുകള്‍ സീറോ ലയബിലിറ്റി പ്രൊട്ടക്ഷന് ചെറിയ ഫീസ് ഈടാക്കാറുണ്ട്. ഇത് നല്‍കേണ്ടി വന്നാല്‍പ്പോലും, അനുമതിയില്ലാതെ നടത്തപ്പെടുന്ന വിനിമയങ്ങളുടെ ബാധ്യതയില്‍ നിന്ന് ഒഴിഞ്ഞു നില്‍ക്കാന്‍ സാധിക്കുന്നു എന്നത് നേട്ടമാണ്.
• അക്കൗണ്ടുകള്‍ സ്ഥിരമായി പരിശോധിക്കുക: വിനിമയങ്ങളുടെ ചരിത്രം പരിശോധിക്കുകയും, ക്രെഡിറ്റ് കാര്‍ഡ് സ്റ്റേറ്റ്‌മെന്റുകള്‍ ഇടയ്ക്കിടെ റിവ്യൂ നടത്തുകയും വേണം. ഏതെങ്കിലും വിധത്തില്‍ സംശയാസ്പദമായ വിനിമയങ്ങള്‍ കണ്ടാല്‍ ഉടന്‍തന്നെ കമ്പനിയെ വിവരമറിയിക്കേണ്ടതാണ്.
• ട്രാന്‍സാക്ഷന്‍ നോട്ടിഫിക്കേഷന്‍ ഉപയോഗിക്കുക: ബാങ്ക്, അല്ലെങ്കില്‍ ക്രെഡിറ്റ് കാര്‍ഡ് ഇഷ്യുവര്‍ നല്‍കുന്ന ട്രാന്‍സാക്ഷന്‍ അലര്‍ട്ട് സേവനങ്ങള്‍ ഉപയോഗപ്പെടുത്താവുന്നതാണ്. ഇത്തരത്തില്‍ സന്ദേശങ്ങള്‍ ലഭിക്കുന്നത് കൂടുതല്‍ ഉപകാരപ്രദമാകും. ചില പ്രത്യേക പരിധി കഴിഞ്ഞുള്ള വിനിമയങ്ങള്‍, ഇന്റര്‍നാഷണല്‍ പര്‍ച്ചേസ്, ബാലന്‍സ് ട്രാന്‍സ്ഫര്‍ റിക്വസ്റ്ര് തുടങ്ങി വിവിധ തരം സേവനങ്ങള്‍ക്ക് നോട്ടിഫിക്കേഷനുകള്‍ സജ്ജീകരിക്കാവുന്നതാണ്.
• ഓണ്‍ലൈന്‍, ഓഫ് ലൈന്‍ വിനിമയങ്ങള്‍ക്ക് ക്രെഡിറ്റ് കാര്‍ഡുകള്‍ ഉപയോഗിക്കുമ്പോള്‍ സുരക്ഷയ്ക്ക് ആദ്യ പരിഗണന നല്‍കുക. ഓണ്‍ലൈന്‍ വിനിമയങ്ങളില്‍ URL ആരംഭിക്കുന്നത് 'https' എന്നാണെന്ന് ഉറപ്പാക്കുക. പബ്ലിക് വൈഫൈ ഉപയോഗിക്കാതിരിക്കുക. സ്റ്റോറുകളില്‍ പെയ്‌മെന്റ് നടത്തുമ്പോള്‍ കാര്‍ഡ് വിവരങ്ങള്‍ രഹസ്യമായി നല്‍കാന്‍ ശ്രദ്ധിക്കുകയും ചെയ്യാം.