കുവൈത്ത് സിറ്റി: കേരളത്തിന്റെ മുൻ മുഖ്യമന്ത്രി ഉമ്മൻചാണ്ടിയുടെ നിര്യാണത്തിൽ കുവൈത്ത് കെ.എം.സി.സി. അനുശോചനം രേഖപ്പെടുത്തി. കേരളത്തിന്റെ ഏറ്റവും മികച്ച ജനകീയ ഭരണാധികാരിയായിരുന്നു ഉമ്മൻ‌ചാണ്ടിയെന്ന് കുവൈത്ത് കെ.എം.സി.സി. അനുശോചന സന്ദേശത്തിൽ പറഞ്ഞു.

സാധാരണക്കാരായ ആളുകളുടെ പരാതിയും, പരിഭവവും കേട്ടും, അതിനു പരിഹാരം കണ്ടും, അവർക്കിടയിൽ ഒരാളായി നിൽക്കുന്നതിൽ ആനന്ദം കണ്ടെത്തിയ നേതാവായിരുന്നു ഉമ്മൻ‌ചാണ്ടി. സമൂഹത്തിന്റെ അടിത്തട്ടിൽ ഉള്ള ആളുകളെ ഉയർത്തികൊണ്ട് വരുന്നതിന് വേണ്ടി അദ്ദേഹത്തിന്റെ ഭരണകാലത്തു നടത്തിയിട്ടുള്ള പ്രവർത്തനങ്ങൾ കേരള ജനതക്ക് ഒരിക്കലും മറക്കാനാവില്ല.

മുസ്ലിം ലീഗുമായും, അതിന്റെ നേതാക്കളുമായും അദ്ദേഹത്തിനുണ്ടായിരുന്നത് വല്ലാത്തൊരു ആത്മബന്ധമായിരുന്നു. കുവൈത്തിൽ മറ്റു പരിപാടികൾക്ക് വരുന്ന അവസരത്തിൽ പോലും കെ.എം.സി.സി. ഓഫീസ് സന്ദർശിക്കാനും, കെ.എം.സി.സി. യുടെ പരിപാടികളിൽ പങ്കെടുക്കാനും അദ്ദേഹം കാണിക്കുന്ന താല്പര്യം മറക്കാനാവാത്തതാണ്.

അദ്ദേഹത്തിന്റെ വേർപാടിൽ കുടുംബത്തിന്റെയും, കോൺഗ്രസ്‌, യു.ഡി.എഫ് പ്രവർത്തകരുടെയും ദുഃഖത്തിൽ കുവൈത്ത് കെ.എം.സി.സി.യും പങ്ക് ചേരുന്നതായി പ്രസിഡന്റ്‌ ഷറഫുദ്ധീൻ കണ്ണേത്തും , ജനറൽ സെക്രട്ടറി എം.കെ. അബ്ദുൽ റസാഖ് പേരാമ്പ്രയും അനുശോചന സന്ദേശത്തിൽ പറഞ്ഞു.