കഅ്ബ നാളെ പുതിയ കിസ്‌വയണിയും; ഒരുക്കങ്ങൾ പൂർത്തിയായി

മക്ക: വിശുദ്ധ കഅ്ബക്ക് മേലങ്കിയണിയിക്കുന്ന (കിസ്‌വ) ചടങ്ങ് നാളെ നടക്കും. സ്വർണ നൂലും വെള്ളി നൂലും കൊണ്ട് നെയ്‌തെടുക്കുന്ന മനോഹരമായ കിസ്‍വ സ്ഥാപിക്കുന്നതിനുള്ള ഒരുക്കങ്ങളെല്ലാം പൂർത്തിയായി. കിസ്‌വയുടെ ചുമതലയുള്ള കിങ് അബ്ദുൽ അസീസ് കിസ്​വ നിർമ്മാണ കേന്ദ്രത്തിലെ ഒരുക്കങ്ങളെല്ലാം പൂർത്തിയായതായി അറിയിച്ചു.

ഹിജ്റ കലണ്ടറിലെ ആദ്യമാസമായ മുഹറം ഒന്നിനാണ് പുതിയ കിസ്‌വ കഅ്ബയെ അണിയിക്കുന്നത്. ചടങ്ങിൽ സഊദിയിലെ മന്ത്രിമാർ, അമീർമാർ, വിവിധ രാജ്യങ്ങളിലെ പ്രതിനിധികൾ, പ്രത്യേകം ക്ഷണിക്കപ്പെട്ട വിശിഷ്ട അതിഥികൾ, നയതന്ത്ര ഉദ്യോഗസ്ഥർ തുടങ്ങിയവരെല്ലാം സന്നിഹിതരാകും.

200 വിദഗ്ധ ജീവനക്കാരുടെ നേതൃത്വത്തിലാണ് കിസ്‌വ നിർമാണം പൂർത്തിയാക്കിയത്. ഏകദേശം 120 കിലോ സ്വർണ്ണ നൂലും,100 കിലോ വെള്ളി നൂലും കിസ്‌വ നിർമാണത്തിനായി ഉപയോഗിക്കുന്നുണ്ട്. കിസ്‌വയിലെ അറബി ആലേഖനവും തുന്നലുകളുമെല്ലാം ഈ നൂലുകൾ ഉപയോഗിച്ചാണ് ചെയ്യുന്നത്. ലോകത്തിലെ തന്നെ ഏറ്റവും ഉയർന്ന പട്ട് തുണിയാണ് കിസ്‌വക്കായി ഉപയോഗിക്കുന്നത്.

അതേസമയം, നിലവിൽ ഉണ്ടായിരുന്ന കിസ്‌വ നശിപ്പിച്ച് കളയുകയോ ഉപേക്ഷിക്കുകയോ ചെയ്യില്ല. പകരം ഇവയെ ചെറു കഷ്ണങ്ങളാക്കി മാറ്റി വിവിധ വ്യക്തികൾക്കും സംഘടനകൾക്കും സമ്മാനങ്ങളായി നൽകും. ചരിത്രപരമായതും മതപരമായതുമായ സംഘടനകൾക്കാണ് ഇവ നൽകുക. ഇതിന് പുറമെ വിവിധ അറബ് രാജ്യങ്ങൾക്കും സമ്മാനമായി നൽകും.

മുൻപ് ബലി പെരുന്നാളിനോട് അനുബന്ധിച്ച് അറഫാ ദിനത്തിലായിരുന്നു പുതിയ കിസ്‌വ കഅ്ബയെ അണിയിച്ചിരുന്നത്. എന്നാൽ ഒരു വർഷം മുൻപാണ് മുഹറം ഒന്നിലേക്ക് ചടങ്ങ് മാറ്റിയത്.