യു.കെയില്‍ പോവുന്നുണ്ടോ? പോക്കറ്റ് കാലിയാവും; എമിഗ്രേഷന്‍ ചാര്‍ജുകള്‍ കുത്തനെ കൂട്ടി സര്‍ക്കാര്‍

കഴിഞ്ഞ കുറച്ച് നാളുകയായി യു.കെ തങ്ങളുടെ കുടിയേറ്റ നിയമങ്ങളില്‍ കാതലായ മാറ്റങ്ങള്‍ വരുത്തിക്കൊണ്ടിരിക്കുകയാണ്. കഴിഞ്ഞ ദിവസമാണ് അനധികൃത കുടിയേറ്റം വ്യാപകമാവുന്നുണ്ടെന്ന് ആരോപിച്ച് അഞ്ച് കോമണ്‍വെല്‍ത്ത് രാജ്യങ്ങളില്‍ നിന്നുള്ള പൗരന്‍മാര്‍ക്ക് രാജ്യത്തേക്ക് പ്രവേശിക്കുന്നതില്‍ നിന്ന് നിയന്ത്രിക്കുമെന്നും യു.കെ പ്രഖ്യാപിച്ചിരുന്നു. ഇതിന് പിന്നാലെയാണ് എമിഗ്രേഷന്‍ ഫീസുകളില്‍ വലിയ വര്‍ധന പ്രഖ്യാപിച്ച് കൊണ്ട് യു.കെ ഭരണകൂടം രംഗത്തെത്തിയിരിക്കുന്നത്. വിസ ആപ്ലിക്കേഷന്‍ ഫീസ്, ഇമിഗ്രേഷന്‍ ഹെല്‍ത്ത് സര്‍ച്ചാര്‍ജ് എന്നിവയാണ് വര്‍ധിപ്പിച്ചത്. കേരളമടക്കമുള്ള ഇന്ത്യന്‍ സംസ്ഥാനങ്ങളില്‍ നിന്നുള്ള വിദ്യാര്‍ത്ഥികളില്‍ നല്ലൊരു ശതമാനവും വിദേശ വിദ്യാഭ്യാസത്തിനായി തെരഞ്ഞെടുക്കുന്ന ആദ്യ രാജ്യങ്ങളിലൊന്ന് യു.കെ ആണ്. അതുകൊണ്ട് തന്നെ പുതിയ തീരുമാനം ഇന്ത്യക്കാര്‍ക്ക് വലിയ തിരിച്ചടിയാകുമെന്നാണ് കരുതുന്നത്.

തൊഴില്‍, വിസിറ്റ് വിസകള്‍ക്കുമുള്ള ഫീസില്‍ 15 ശതമാനമാണ് വര്‍ധന. പെര്‍മനെന്റ് റെസിഡന്‍സി (ഐ.എല്‍.ആര്‍) അപേക്ഷകള്‍ക്ക് 20 ശതമാനം വര്‍ധനവാണ് വരുത്തിയത്. യു.കെയിലെത്തുന്ന കുടിയേറ്റക്കാര്‍ക്ക് എന്‍.എച്.എസ് സേവനങ്ങള്‍ ലഭ്യമാക്കുന്നതിനുള്ള ഇമിഗ്രേഷന്‍ ഹെല്‍ത്ത് സര്‍ച്ചാര്‍ജില്‍ (ഐ.എച്.എസ്) 66 ശതമാനമാണ് വര്‍ധനയുണ്ടായിട്ടുള്ളത്. 1,035 പൗണ്ടാണ് പുതുക്കിയ ഹെല്‍ത്ത് സര്‍ച്ചാര്‍ജ്. നേരത്തെ 624 പൗണ്ടുണ്ടായിരുന്ന സ്ഥാനത്താണ് വലിയ വര്‍ധന വരുത്തിയിരിക്കുന്നത്.

വിദ്യാര്‍ത്ഥികള്‍ക്കും 18 വയസില്‍ താഴെയുള്ളവര്‍ക്കുമുള്ള ഹെല്‍ത്ത് സര്‍ച്ചാര്‍ജിനും വര്‍ധന ബാധകമാണ്. നേരത്തെ 470 പൗണ്ടുണ്ടായിരുന്നത് 776 പൗണ്ടായാണ് വര്‍ധിപ്പിച്ചിട്ടുള്ളത്. കൂട്ടത്തില്‍ വൈദഗ്ദമുള്ള തൊഴിലാളി വിസ 625 പൗണ്ടില്‍ നിന്ന് 718.75 പൗണ്ടായും ഉയരും.

മറ്റ് വര്‍ധനകള്‍

പെര്‍മനെന്റ് റസിഡന്‍സി അപേക്ഷ ഫീസ് 20 ശതമാനം വര്‍ധിക്കും. ഇതോടെ നേരത്തെയുണ്ടായിരുന്ന 2404 പൗണ്ടിന് പകരം 2880 പൗണ്ട് കൊടുക്കേണ്ടി വരും.

ബ്രിട്ടീഷ് പൗരത്വം നേടാനുള്ള അപേക്ഷ ഫീസ്, സ്റ്റുഡന്റ് വിസ എന്നിവ 20 ശതമാനം വര്‍ധിപ്പിച്ചു.

സെറ്റില്‍മെന്റ്, വൈഡര്‍ എന്‍ട്രി ക്ലിയറന്‍സ്, സ്‌പോണ്‍സര്‍ഷിപ്പ് സര്‍ട്ടിഫിക്കറ്റുകള്‍, മുന്‍ഗണന വിസകള്‍ എന്നിവയും 20 ശതമാനം വര്‍ധിക്കും.

സര്‍ക്കാരിന്റെ തീരുമാനം മികച്ച ജീവിത സൗകര്യങ്ങള്‍ സ്വപ്‌നം കണ്ട് കടല്‍ കടക്കുന്ന വിദ്യാര്‍ത്ഥികളും വലിയ ആശങ്കയോടെയാണ് നോക്കി കാണുന്നത്.