കശ്മിരില്‍ അവധിക്കായി എത്തിയ സൈനികനെ ദുരൂഹസാഹചര്യത്തില്‍ കാണാതായി; കാറില്‍ രക്തക്കറയെന്ന് റിപ്പോര്‍ട്ട്

ശ്രീനഗര്‍: തെക്കന്‍ കശ്മിരിലെ കുല്‍ഗാം ജില്ലയില്‍ സൈനികനെ കാണാതായി. ജമ്മു കശ്മീര്‍ ലൈറ്റ് ഇന്റഫന്‍ട്രി റെജിമെന്റിലെ സൈനികന്‍ ജാവേദ് അഹമ്മദിനെ(25) ആണ് കാണാതായത്. ഈദ് അവധിക്ക് നാട്ടിലെത്തിയതായിരുന്നു ജാവേദ്. തിങ്കളാഴ്ച്ച തിരികെ ഡ്യൂട്ടിയില്‍ കയറേണ്ടതായിരുന്നു.

ഇന്നലെ വൈകീട്ട് 6.30 ഓടെ മാര്‍ക്കറ്റില്‍ നിന്ന് സാധനങ്ങള്‍ വാങ്ങാന്‍ ഇറങ്ങിയതായിരുന്നു. രാത്രി 9 മണിയായിട്ടും തിരികെ വീട്ടിലെത്താത്തതിനെ തുടര്‍ന്ന് വീട്ടുകാര്‍ നടത്തിയ തെരച്ചിലില്‍ മാര്‍ക്കറ്റിന് സമീപത്ത് നിന്ന് ജാവേദിന്റ ആള്‍ട്ടോ കാര്‍ കണ്ടെത്തി. കാറില്‍ രക്തക്കറയുണ്ടെന്നാണ് റിപ്പോര്‍ട്ട്.

സംഭവത്തില്‍ കശ്മിര്‍ പൊലിസ് കേസ് രജിസ്റ്റര്‍ ചെയ്യുകയും ചിലരെ കസ്റ്റഡിയിലെടുക്കുകയും ചെയ്തിട്ടുണ്ട്. ജാവേദിനെ ഭീകരര്‍ തട്ടിക്കൊണ്ടുപോയതാണെന്ന് സംശയിക്കുന്നതായി കുടുംബാംഗങ്ങള്‍ പറഞ്ഞു.