അബുദാബി: ഇന്ത്യയിലെ മികച്ച ഉല്‍പന്നങ്ങള്‍ ലോകത്തിന് മുന്നില്‍ പരിചയപ്പെടുത്തുന്ന 'ലുലു സെലിബ്രേഷന്‍സ് ഓഫ് ഇന്ത്യ' കാമ്പയിന് ലുലു ഹൈപര്‍, സൂപര്‍ മാര്‍ക്കറ്റുകളില്‍ തുടക്കമായി. അബുദാബി അല്‍ വഹ്ദ മാളിലെ ലുലു ഹൈപര്‍ മാര്‍ക്കറ്റില്‍ നടന്ന പരിപാടിയില്‍ ലുലു ഗ്രൂപ് ചെയര്‍മാനും മാനേജിംഗ് ഡയറക്ടറുമായ എം.എ യൂസഫലിയുടെയും മറ്റ് പ്രമുഖരുടെയും സാന്നിധ്യത്തില്‍ ഇന്ത്യന്‍ സ്ഥാനപതി സഞ്ജയ് സുധീര്‍ ഉദ്ഘാടനം ചെയ്തു. ഇന്ത്യന്‍ സ്വാതന്ത്ര്യ ദിനം, ഓണം, ജന്മാഷ്ടമി, ഗണേശ ചതുര്‍ത്ഥി, നവരാത്രി, ദീപാവലി തുടങ്ങിയ വിവിധ പരിപാടികള്‍ ഉള്‍ക്കൊള്ളുന്ന ഉത്സവങ്ങളുടെ പരമ്പരയാണ് ലുലു സെലിബ്രേഷന്‍സ് ഓഫ് ഇന്ത്യ. വരാനിരിക്കുന്ന ഉത്സവ സീസണില്‍ പ്രാദേശിക ഭക്ഷണ പാതകള്‍, സെലിബ്രിറ്റി സന്ദര്‍ശനങ്ങള്‍, പുതിയ ഭക്ഷണം മുതല്‍ പലചരക്ക് സാധനങ്ങള്‍ വരെ ജീവിത ശൈലി, ഫാഷന്‍ വസ്ത്രങ്ങള്‍ വരെ എല്ലാ വിഭാഗങ്ങളിലും അതിശയിപ്പിക്കുന്ന പ്രമോഷനുകളും ഓഫറുകളും സഹിതം ലുലുവില്‍ അതുല്യമായ ആഴത്തിലുള്ള ഷോപ്പിംഗ് അനുഭവം സമ്മാനിക്കും. ഇന്ത്യന്‍ ഉല്‍പന്നങ്ങളുടെ ഏറ്റവും വലിയ ഇറക്കുമതിക്കാരിലൊരാളായ ലുലു ഗ്രൂപ ഈ വര്‍ഷം ഫുഡ്, നോണ്‍ ഫുഡ് വിഭാഗങ്ങളിലായി 5,000 തനത് ഉല്‍പന്നങ്ങള്‍ പ്രദര്‍ശിപ്പിക്കുന്നു.
ഈ വര്‍ഷം 'യുഎന്‍ മില്ലെറ്റ് വര്‍ഷ'മായി ആചരിക്കുന്നതിനാല്‍ ഇന്ത്യ ധാന്യങ്ങള്‍ക്ക് പ്രത്യേക ഊന്നല്‍ നല്‍കുന്നു. 20ലധികം വ്യത്യസ്ത ഇനം ചക്കകള്‍ പ്രദര്‍ശനത്തിലുണ്ട്. കൂടാതെ, വിവിധ തരം ധാന്യങ്ങളില്‍ നിന്ന് ഉണ്ടാക്കിയ വിവിധ പലഹാരങ്ങളും ഹോട്ട് ഫുഡ് കൗണ്ടറില്‍ വില്‍പനക്കുണ്ട്. ഇതിനു പുറമെ, ഉത്തര്‍പ്രദേശിന്റെ ഒഡിഒപി സംരംഭം, മേഘാലയയില്‍ നിന്നുള്ള പൈനാപ്ള്‍, കശ്മീരി ആപ്ള്‍, തമിഴ്‌നാട്ടില്‍ നിന്നുള്ള മുട്ടകള്‍, കേരളത്തില്‍ നിന്നുള്ള പഴങ്ങളും പച്ചക്കറികളും, മറ്റ് ദക്ഷിണേന്ത്യന്‍ സംസ്ഥാനങ്ങളില്‍ നിന്നുള്ള പഴങ്ങളും പച്ചക്കറികളും തുടങ്ങി ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള ഉല്‍പന്നങ്ങളും ലുലു പ്രോത്സാഹിപ്പിക്കുന്നുണ്ട്. ഇന്ത്യന്‍ കരകൗശല വസ്തുക്കള്‍, ഖാദി, പരമ്പരാഗത വസ്ത്രങ്ങള്‍, വിവിധ തരം ഇന്ത്യന്‍ ബിരിയാണികള്‍, ചാറ്റ്, ഗ്രില്ലുകള്‍, ലഘു ഭക്ഷണങ്ങള്‍, ഫലൂദ, മധുര പലഹാരങ്ങള്‍ എന്നിവയും ലുലു സെലിബ്രേഷന്‍സ് ഓഫ് ഇന്ത്യ കാമ്പയിന്‍ കാലയളവിലെ പ്രത്യേകതയാണ്. അല്‍ വഹ്ദ മാളില്‍ നടന്ന ചടങ്ങില്‍ പരമ്പരാഗത വസ്ത്രങ്ങളണിഞ്ഞ് ഫാഷന്‍ ഷോ, ഇന്ത്യന്‍ ക്‌ളാസിക്കല്‍, നാടോടി നൃത്തങ്ങള്‍ എന്നിവയും ഉണ്ടായിരുന്നു. ലുലു സെലിബ്രേഷന്‍സ് ഓഫ് ഇന്ത്യ പ്രമോഷനുകള്‍ ലുലു ഹൈപര്‍ മാര്‍ക്കറ്റുകളിലും ഓണ്‍ലൈനായി ംംം.ഹൗഹൗവ്യുലൃാമൃസല.േരീാലും ലഭ്യമാണ്.
ലുലു സെലിബ്രേഷന്‍സ് ഓഫ് ഇന്ത്യ കാമ്പയിനില്‍ പങ്കെടുക്കാന്‍ കഴിഞ്ഞതില്‍ അഭിമാനിക്കുന്നതായി അംബാസഡര്‍ സഞ്ജയ് സുധീര്‍ പറഞ്ഞു. പ്രദര്‍ശനത്തിനും വില്‍പനക്കുമുള്ള ഉല്‍പന്നങ്ങളുടെ നിരയില്‍ നിക്ക് അത്ഭുതം തോന്നിയെന്നും അദ്ദേഹം വ്യക്തമാക്കി. ''ഇന്ത്യയില്‍ നിന്ന് പുതുതായി കൊണ്ടുവന്ന ഈ ഉല്‍പന്നങ്ങള്‍ ശ്രദ്ധേയമാണ്. ലുലു ഗ്രൂപ്പിന് എല്ലാ വിജയങ്ങളും നേരുന്നു. വര്‍ഷാ വര്‍ഷം നിങ്ങള്‍ ഈ പരിപാടി ആഘോഷിക്കുന്നത് തുടരുമെന്ന് ഞാന്‍ ആത്മാര്‍ത്ഥമായി പ്രതീക്ഷിക്കുന്നു. ഇത് ഇന്ത്യന്‍ സമൂഹത്തിനും ഇന്ത്യക്ക് മൊത്തത്തിലും വിലപ്പെട്ട സംഭാവനയാണ്'' -അദ്ദേഹം വ്യക്തമാക്കി.
ഇത്തരം ഉത്സവങ്ങളിലൂടെ, ഇന്ത്യന്‍ ഉല്‍പന്നങ്ങള്‍ പ്രദര്‍ശിപ്പിക്കാനും ജനകീയമാക്കാനും തങ്ങള്‍ ശ്രമിക്കുന്നുവെന്ന് ലുലു ഗ്രൂപ ചെയര്‍മാനും മാനേജിംഗ് ഡയറക്ടറുമായ എം.എ യൂസഫലി പറഞ്ഞു. യുഎഇ പ്രസിഡന്റ് ശൈഖ് മുഹമ്മദ് ബിന്‍ സായിദ് അല്‍ നഹ്‌യാനും ഇന്ത്യന്‍ പ്രധാനമന്ത്രി നരേന്ദ്ര മോദിയും തമ്മിലുള്ള വ്യക്തിബന്ധവും സൗഹൃദവും നമ്മുടെ രാജ്യങ്ങള്‍ തമ്മിലുള്ള ബന്ധം ശക്തിപ്പെടുത്തുന്നു. സമീപ കാലത്ത് ഒപ്പിട്ട സമഗ്ര സാമ്പത്തിക പങ്കാളിത്ത കരാര്‍ (സിഇപിഎ) ഇരു രാജ്യങ്ങളുടെയും ബിസിനസുകള്‍ക്ക് കൂടുതല്‍ നേട്ടമുണ്ടാക്കുന്നു. ഇന്ത്യയുടെ താല്‍പര്യങ്ങള്‍ മുന്നോട്ട് കൊണ്ടുപോകുന്നതില്‍ ഇന്ത്യന്‍ എംബസിയുടെ പൂര്‍ണ മനസ്സോടെയുള്ള പിന്തുണക്ക് തങ്ങള്‍ അങ്ങേയറ്റം നന്ദിയുള്ളവരാണെന്നും യൂസഫലി വ്യക്തമാക്കി.