ഡീസല്‍ ലോറി മറിഞ്ഞ സ്ഥലത്തെ കിണറ്റില്‍ തീപിടിത്തം, വിഡിയോ

മലപ്പുറം: ഡീസലുമായി പോയ ടാങ്കര്‍ ലോറി മറിഞ്ഞതിനു പിന്നാലെ സമീപ പ്രദേശത്തെ കിണറുകളില്‍ തീപിടുത്തം. പെരിന്തല്‍മണ്ണ അങ്ങാടിപ്പുറത്താണ് സംഭവം. ചീരട്ടാമല റോഡില്‍ പരിയാപുരത്ത് ഞായറാഴ്ച പുലര്‍ച്ചെ നാലോടെ ഡീസല്‍ ലോറി മറിഞ്ഞിരുന്നു. ഇതിന് പിന്നാലെയാണ് കിണറിനുള്ളില്‍ തീപിടുത്തമുണ്ടായത്. പരിയാപുരം കൊല്ലറേശ്ശുമറ്റത്തില്‍ ബിജുവിന്റെ വീട്ടിലെ കിണറ്റിലാണ് തീപിടിത്തമുണ്ടായിരിക്കുന്നത്.

സമീപത്തെ സേക്രട് ഹാര്‍ട്ട് കോണ്‍വെന്റിലെ കിണറ്റിലും തീപിടിത്തമുണ്ടായി. മോട്ടര്‍ പ്രവര്‍ത്തിപ്പിക്കാനായി സ്വിച്ചിട്ടപ്പോള്‍ കിണറിന്റെ ഉള്ളില്‍ തീപിടിത്തമുണ്ടാവുകയായിരുന്നു എന്നാണ് വീട്ടുകാര്‍ പറയുന്നത്.

അപകടം നടക്കുമ്പോള്‍ ഇരുപതിനായിരം ലിറ്റര്‍ ഡീസല്‍ ടാങ്കര്‍ ലോറിയിലുണ്ടായിരുന്നു. ഇതിലെ ഭൂരിഭാഗം ഡീസലും അന്ന് ഒഴുകിയിരുന്നു. ഇതാണ് കിണറില്‍ തീപിടിക്കാന്‍ കാരണം എന്നാണ് അനുമാനം. എറണാകുളത്തുനിന്നു ഡീസലുമായി കൊണ്ടോട്ടിയിലേക്കു പോവുകയായിരുന്ന ടാങ്കര്‍ ലോറിയായിരുന്നു അപകടത്തില്‍ പെട്ടത്.