ആലപ്പുഴ: ആലപ്പുഴയില്‍ കാട്ടില്‍ ഉപേക്ഷിച്ച നിലയില്‍ നവജാതശിശുവിനെ കണ്ടെത്തി. ആക്രി പെറുക്കാനെത്തിയ അതിഥിതൊഴിലാളികളാണ് കുഞ്ഞിനെ കണ്ടെത്തിയത്. ആലപ്പുഴ തുമ്പോളി ജംഗ്ഷനു സമീപത്തെ കാട്ടിലാണ് കുഞ്ഞിനെ ഉപേക്ഷിച്ചിരുന്നത്.

ആക്രി പെറുക്കാനെത്തിയ അതിഥിതൊഴിലാളികള്‍ കുഞ്ഞിന്റെ കരച്ചില്‍ കേട്ട് തൊട്ടടുത്ത വീട്ടുകാരെ വിവരം അറിയിക്കുകയായിരുന്നു. ഈ വീട്ടുകരാണ് നാട്ടുകാരെയും പൊലിസിനെയും കൗണ്‍സിലറെയും വിവരം അറിയിച്ചത്. കുഞ്ഞിനെ കണ്ടെത്തിയ സമയത്ത് ശരീരത്തില്‍ രക്തത്തിന്റെ അംശം പറ്റിപ്പിടിച്ചിരുന്ന അവസ്ഥയിലായിരുന്നതിനാല്‍ ഉടനെ തന്നെ സമീപത്തെ വനിതാശിശു ആശുപത്രിയില്‍ പ്രവേശിപ്പിച്ചതായി നാട്ടുകാര്‍ പറഞ്ഞു. നിലവില്‍ കുഞ്ഞ് സുരക്ഷിതമായിരിക്കുന്നുവെന്നും സംഭവത്തില്‍ അന്വേഷണം ആരംഭിച്ചതായും പൊലിസ് അറിയിച്ചു.