ന്യൂഡല്‍ഹി: ഗ്യാങ്‌സ്റ്റേഴ്‌സിനെ പിടിക്കാന്‍ വടക്കേ ഇന്ത്യയില്‍ എന്‍.ഐ.എയുടെ വ്യാപക റെയ്ഡ്. വിവിധ ഗ്യാങ്സ്റ്റര്‍ ഗ്രൂപ്പുകളുടെ കേന്ദ്ര സ്ഥാനങ്ങള്‍ ഡല്‍ഹി, ഹരിയാന, ഉത്തര്‍പ്രദേശം, പഞ്ചാബ് തുടങ്ങി 60 ഇടങ്ങളിലായാണ് ഇന്ന് റെയ്ഡ് നടക്കുന്നത്.

യു.എ.പി.എ പ്രകാരം പത്ത് സംഘങ്ങള്‍ക്കു മേല്‍ ഡല്‍ഹി പൊലിസ് രണ്ട് എഫ്.ഐ.ആര്‍ തയ്യാറാക്കിയിരുന്നു. ഇതിന് പിന്നാലെയാണ് എന്‍.ഐ.എയും രംഗത്തെത്തിയത്.

ഇന്ത്യയില്‍ നിന്നും വിദേശത്തുനിന്നും പ്രവര്‍ത്തിക്കുന്ന സംഘങ്ങള്‍ തീവ്രവാദ വിരുദ്ധ സേനയുടെ നിരീക്ഷണത്തില്‍ ഉള്‍പ്പെട്ടിട്ടുണ്ട്. ചില തീവ്രവാദ കേസുകളില്‍ നടത്തിയ അന്വേഷണത്തില്‍ സംഘങ്ങളും തീവ്രവാദികളും തമ്മിലുള്ള അവിശുദ്ധ ബന്ധം വെളിപ്പെട്ടിട്ടുണ്ടെന്നും എന്‍.ഐ.എ ഉദ്യോഗസ്ഥര്‍ പറഞ്ഞു. ചില സംഘങ്ങള്‍ ജയിലുകളില്‍ നിന്നാണ് പ്രവര്‍ത്തിക്കുന്നതെന്നും അവര്‍ കൂട്ടിച്ചേര്‍ത്തു.