മലപ്പുറം: സമുദായ നേതൃനിരയിലും സമസ്ത കേരളാ ജംഇയ്യത്തുല്‍ ഉലമക്കും ഉജ്വല സംഭാവനകളാണ് പാണക്കാട് സയ്യിദ് ഉമറലി ശിഹാബ് തങ്ങളുടേതെന്നും കരുത്തുറ്റ നേതൃത്വമായിരുന്ന തങ്ങളുടെ സേവനങ്ങള്‍ എക്കാലത്തും സ്മരിക്കപ്പെടുമെന്നും സമസ്ത ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍.
പാണക്കാട് സയ്യിദ് ഉമറലി ശിഹാബ് തങ്ങള്‍ ചാരിറ്റബിള്‍ സൊസൈറ്റി സംഘടിപ്പിച്ച ത്രിദിന ഓണ്‍ലൈന്‍ പ്രഭാഷണം സമാപന ദിന പരിപാടി ഉദ്ഘാടനം ചെയ്യുകയായിരുന്നു അദ്ദേഹം. സ്മാരകങ്ങള്‍ കൂടാതെ എക്കാലത്തും നിലനില്‍ക്കുന്ന സ്മരണയാണ് മഹാന്‍മാരുടേത്. എന്നാല്‍ അവരുടെ സ്മരണയിലൂടെ സമുദായ പുരോഗതിക്കാവശ്യമായ സ്ഥാപനങ്ങളൊരുക്കുകയെന്നതാണ് ഇതിലൂടെ നാം ലക്ഷ്യമിടുന്നത്.

ഉമറലി തങ്ങളുടെ നാമധേയത്തില്‍ ആരംഭിച്ച ചാരിറ്റബിള്‍ സൊസൈറ്റി നടത്തുന്ന സേവനങ്ങള്‍ ഇത്തരത്തില്‍ ശ്ലാഖനീയമാണെന്നും ആലിക്കുട്ടി മുസ്‌ലിയാര്‍ പറഞ്ഞു. പാണക്കാട് മഖാമില്‍ നടന്ന സിയാറത്തിന് പ്രൊഫ. കെ. ആലിക്കുട്ടി മുസ്‌ലിയാര്‍ നേതൃത്വം നല്‍കി.
ത്രിദിന പ്രഭാഷണ സമാപന സെഷനില്‍ പാണക്കാട് റശീദലി ശിഹാബ് തങ്ങള്‍ അധ്യക്ഷനായി. മുസ്തഫ ഹുദവി ആക്കോട് മുഖ്യപ്രഭാഷണം നടത്തി. ഹമീദലി ശിഹാബ് തങ്ങള്‍, ബശീറലി ശിഹാബ് തങ്ങള്‍, യു. മുഹമ്മദ് ശാഫി ഹാജി, ഹംസ ഹാജി മൂന്നിയൂര്‍ സംസാരിച്ചു. കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി സമാപന പ്രാര്‍ഥനയ്ക്ക് നേതൃത്വം നല്‍കി. സത്താര്‍ പന്തലൂര്‍ സ്വാഗതവും സി.പി.ഇഖ്ബാല്‍ നന്ദിയും പറഞ്ഞു.