കാസര്‍കോട് • കാസര്‍കോട് ജില്ലയുടെ ആരോഗ്യമേഖലയിലെ ഗുരുതരമായ പ്രശ്‌നങ്ങള്‍ക്ക് പരിഹാരം കാണണമെന്നാവശ്യപ്പെട്ട് സാമൂഹിക പ്രവര്‍ത്തക ദയാബായി സെക്രട്ടേറിയറ്റിനു മുമ്പില്‍ ഒക്ടോബര്‍ രണ്ടിന് അനിശ്ചിതകാല നിരാഹാര സമരമാരംഭിക്കും. നിരവധി തവണ സര്‍ക്കാരിന് മുമ്പില്‍ നിവേദനങ്ങളും പരാതികളും നല്‍കിയെങ്കിലും ഫലമുണ്ടാകാത്തതിനാലാണ് സമരത്തിനിറങ്ങുന്നതെന്നും എന്‍ഡോസള്‍ഫാന്‍ മൂലമുണ്ടാകുന്ന രോഗങ്ങളെ തിരിച്ചറിഞ്ഞ് ആവശ്യമായ ചികിത്സ നല്‍കാന്‍ പഠനവും ഗവേഷണവും നടത്താവുന്ന ആരോഗ്യ സംവിധാനങ്ങള്‍ ജില്ലയില്‍ നിര്‍ബന്ധമാണെന്നും ദയാബായി വാര്‍ത്താസമ്മേളനത്തില്‍ പറഞ്ഞു.
കേരള സര്‍ക്കാര്‍ കേന്ദ്രത്തിനു നല്‍കിയ എയിംസ് പ്രൊപ്പൊസലില്‍ കാസര്‍കോട് ജില്ലയുടെ പേരും ഉള്‍പ്പെടുത്തുക, ഉക്കിനടുക്ക മെഡിക്കല്‍ കോളജ്, ജില്ലാ ആശുപത്രി, ജനറല്‍ ആശുപത്രി, ടാറ്റ ആശുപത്രി, അമ്മയും കുഞ്ഞും ആശുപത്രി എന്നിവിടങ്ങളില്‍ വിദഗ്ധ ചികിത്സാ സംവിധാനങ്ങള്‍ ഒരുക്കുക തുടങ്ങിയ ആവശ്യങ്ങളും ദയാബായി ഉന്നയിച്ചു.

മുഴുവന്‍ ഗ്രാമ പഞ്ചായത്ത്, നഗരസഭകളിലും ദിന പരിചരണ കേന്ദ്രങ്ങള്‍ സ്ഥാപിക്കുക, മാനസിക വെല്ലുവിളി നേരിടുന്നവര്‍ക്കും കിടപ്പിലായവര്‍ക്കും പകല്‍ നേരം സംരക്ഷണവും പരിചരണവും നല്‍കാനാവശ്യമായ കേന്ദ്രങ്ങള്‍ സ്ഥാപിക്കുക, എന്‍ഡോസള്‍ഫാന്‍ ദുരിതബാധിതരെ കണ്ടെത്തുന്നതിന് പ്രത്യേക മെഡിക്കല്‍ ക്യാംപ് സംഘടിപ്പിക്കുക തുടങ്ങിയ ആവശ്യങ്ങളുമുന്നയിച്ചാണ് സമരം. വാര്‍ത്താസമ്മേളനത്തില്‍ ദയാബായി, കരീം ചൗക്കി, സുബൈര്‍ പടുപ്പ്, ഹമീദ് ചേരങ്കൈ, മുനീര്‍ ആറങ്ങാടി, അമ്പലത്തറ കുഞ്ഞികൃഷ്ണന്‍, ഷാഫി കല്ലുവളപ്പില്‍, താജുദ്ധീന്‍ പടിഞ്ഞാര്‍ സംബന്ധിച്ചു.