മേപ്പയ്യൂര്‍: നരക്കോട് ഇരിങ്ങത്ത് റോഡില്‍ എ.വി അബ്ദുല്ലയുടെ വീടിനു മുന്‍വശത്തെ റോഡിലും പറമ്പിലുമായി സാമൂഹ്യവിരുദ്ധര്‍ കക്കൂസ് മാലിന്യമിറക്കി. തിങ്കളാഴ്ച രാത്രിയാണ് ലോറിയില്‍ കൊണ്ടുവന്നു കക്കൂസ് മാലിന്യം ഇറക്കിയത്.
റോഡില്‍ 100 മീറ്റര്‍ സ്ഥലത്തു മാലിന്യം കെട്ടിക്കിടക്കുകയാണ്. ഇവിടെ നിന്നു രൂക്ഷമായ ദുര്‍ഗന്ധം ഉയര്‍ന്നതിനെ തുടര്‍ന്നു നാട്ടുകാര്‍ നടത്തിയ അന്വേഷണത്തിലാണ് റോഡിലും പറമ്പിലും മാലിന്യം നിക്ഷേപിച്ചതായി കണ്ടത്. രൂക്ഷമായ ഗന്ധം കാരണം റോഡിലൂടെ നടന്നുപോകാന്‍ പറ്റാത്ത സ്ഥിതിയാണ്. സംഭവത്തില്‍ നാട്ടുകാര്‍ പ്രതിഷേധമുയര്‍ത്തിയതിനെ തുടര്‍ന്ന് മേപ്പയ്യൂര്‍ പൊലിസ് സ്ഥലത്തെത്തി കേസ് രജിസ്റ്റര്‍ ചെയ്ത് അന്വേഷണമാരംഭിച്ചു. അയല്‍വീടുകളിലെ സി.സി.ടി.വി ദൃശ്യങ്ങളും പൊലിസ്  പരിശോധിക്കുന്നുണ്ട്.
ജനപ്രതിനിധികളായ എന്‍.എം ദാമോദരന്‍, പി. കുഞ്ഞിമൊയ്തി, ഇ. ശ്രീജയ എന്നിവരുടെ നേതൃത്വത്തില്‍ ആരോഗ്യ പ്രവര്‍ത്തകരും നാട്ടുകാരും സംഭവസ്ഥലത്ത് ക്ലോറിനേഷന്‍ നടത്തി.