ഷാര്‍ജ: സിഎസ്‌ഐ പാരിഷിലെ സ്ത്രീജനസഖ്യം സംഘടിപ്പിച്ച പായസ മത്സരം ഇടവകാംഗങ്ങളുടെ പങ്കാളിത്തം കൊണ്ടും രുചിക്കൂട്ടുകളുടെ വൈവിധ്യം കൊണ്ടും ശ്രദ്ധേയമായി. വ്യത്യസ്ത രുചികളില്‍ തയാറാക്കിയ പായസങ്ങള്‍ ഗൃഹാതുര സ്മരണകളുണര്‍ത്തി. ഇടവക വികാരി റവ.സുനില്‍ രാജ് ഫിലിപ് പായസ മത്സരം ഉദ്ഘാടനം ചെയ്തു. നിരവധി പേര്‍ പങ്കെടുത്ത മത്സരത്തില്‍ ജോയ്‌സ് എബ്രഹാം, ആന്‍സി.പി കോശി, ഐഡ സാറ മാത്യു എന്നിവര്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടി.
സ്ത്രീജനസഖ്യം നേതൃത്വം നല്‍കിയ മത്സരത്തില്‍ മേഴ്‌സി മാത്യു, ജിഞ്ചു സന്‍മേഷ് വിധികര്‍ത്താക്കളായിരുന്നു. മിനി ബി.തോമസിന്റെ പ്രാര്‍ത്ഥനയോടെ ആരംഭിച്ച മത്സരത്തില്‍ സ്ത്രീജനസഖ്യം പ്രസിഡന്റ് നിവി സൂസന്‍ ജോര്‍ജ് സ്വാഗതവും സെക്രട്ടറി ജാന്‍സി ബിജു നന്ദിയും പറഞ്ഞു. വിജയികള്‍ക്ക് ഗിഫ്റ്റ് വൗച്ചറുകളും സര്‍ട്ടിഫിക്കറ്റുകളും പങ്കെടുത്ത എല്ലാവര്‍ക്കും സാക്ഷ്യപത്രങ്ങളും നല്‍കി.