തിരുവനന്തപുരം: ഈ വര്‍ഷത്തെ എസ്.എസ്.എല്‍.സി പരീക്ഷയില്‍ കേരള പൊലിസിന്റെ 'ഹോപ്പ്' പദ്ധതിവഴി പരീക്ഷയെഴുതിയ വിദ്യാര്‍ഥികള്‍ക്കു മികച്ച വിജയം.
പദ്ധതിയിലൂടെ പരിശീലനം ലഭിച്ച് പരീക്ഷയെഴുതിയ 394 കുട്ടികളില്‍ 365 പേര്‍ ഉന്നത വിദ്യാഭ്യാസത്തിനു യോഗ്യത നേടിയതായി സംസ്ഥാന നോഡല്‍ ഓഫിസര്‍ ഐ.ജി പി വിജയന്‍ അറിയിച്ചു.
മാനസികാരോഗ്യ പ്രശ്‌നങ്ങളാലും സാമൂഹിക വെല്ലുവിളികള്‍ മൂലവും പഠനം പാതിവഴിയില്‍ ഉപേക്ഷിക്കുകയോ പത്താം ക്ലാസ് പരീക്ഷയില്‍ തോല്‍ക്കുകയോ ചെയ്ത കുട്ടികളെ കണ്ടെത്തി പ്രത്യേക പരിശീലനം നല്‍കി അടിസ്ഥാന വിദ്യാഭ്യാസം ഉറപ്പാക്കുന്നതാണ് പദ്ധതി.
ഈ വര്‍ഷം വിവിധ ഓണ്‍ലൈന്‍ മാധ്യമങ്ങളില്‍കൂടിയായിരുന്നു വിദ്യാര്‍ഥികള്‍ക്ക് പരിശീലനം നല്‍കിയത്. മികച്ച വിജയത്തിന്റെ അടിസ്ഥാനത്തില്‍ പദ്ധതി വിപുലമാക്കാന്‍ തീരുമാനിച്ചിട്ടുണ്ട്.
വിവിധ സന്നദ്ധ സംഘടനകളുടെ സഹായത്തോടെ കുട്ടികള്‍ക്ക് വിവിധ തൊഴില്‍ മേഖലകളില്‍ പരിശീലനം നല്‍കുന്ന രീതിയില്‍ പദ്ധതി വിപുലമാക്കാനാണ് തീരുമാനം.
പദ്ധതി കാര്യക്ഷമമായി നടപ്പിലാക്കുന്നതിന് എല്ലാ ജില്ലകളിലും പ്രത്യേക പരിശീലകരുടെ പട്ടിക തയാറാക്കും.