ബാരാമുല്ല: ജമ്മു കശ്മീരിലെ വിവിധയിടങ്ങളില്‍ ഭീകരരും സുരക്ഷാസേനയും തമ്മില്‍ ഏറ്റുമുട്ടല്‍. ബാരാമുല്ലയിലും ഷോപ്പിയാനിലുമാണ് ഏറ്റുമുട്ടല്‍ നടക്കുന്നത്.

പുലര്‍ച്ചെ ഷോപ്പിയാന്‍ ജില്ലയിലെ ചിത്രഗം ഏരിയയിലാണ് ആദ്യം ഏറ്റുമുട്ടല്‍ ആരംഭിച്ചത്. തുടര്‍ന്ന് ബാരാമുല്ലയിലെ യെദിപോറ, പഥാന്‍ ഏരിയയിലും ഏറ്റുമുട്ടല്‍ റിപ്പോര്‍ട്ട് ചെയ്തു.

ജമ്മു കശ്മീര്‍ പൊലീസും സുരക്ഷാസേനയും ഏറ്റുമുട്ടലില്‍ പങ്കെടുക്കുന്നതായി കശ്മീര്‍ സോണ്‍ പൊലീസ് അറിയിച്ചു.

കഴിഞ്ഞ ചൊവ്വാഴ്ച കുല്‍ഗാം ജില്ലയിലെ അവോതു വില്ലേജില്‍ സുരക്ഷാസേന നടത്തിയ ഏറ്റുമുട്ടലില്‍ രണ്ട് ഭീകരരെ വധിച്ചിരുന്നു. പരിശോധനയില്‍ ആയുധങ്ങളും സ്‌ഫോടകവസ്തുക്കളും കണ്ടെടുത്തിരുന്നു.