കണ്ണൂര്‍: കണ്ണൂര്‍ വിമാനത്താവളത്തില്‍ നിന്നു ജിദ്ദയിലേക്കു നേരിട്ട് വിമാന സര്‍വിസ് തുടങ്ങുന്നു. നവംബര്‍ ആറുമുതല്‍ എയര്‍ ഇന്ത്യാ എക്‌സ്പ്രസാണു കണ്ണൂര്‍ ജിദ്ദ സെക്ടറില്‍ സര്‍വിസ് ആരംഭിക്കുന്നത്. വിമാനത്തിന്റെ ടിക്കറ്റ് ബുക്കിങ് ആരംഭിച്ചു. വിമാനത്താവളം പ്രവര്‍ത്തനം തുടങ്ങിയ ശേഷം ആദ്യമായാണു കണ്ണൂരില്‍ നിന്നു ജിദ്ദയിലേക്കു നേരിട്ട് വിമാന സര്‍വിസ് ആരംഭിക്കുന്നത്. തുടക്കത്തില്‍ ഞായറാഴ്ചകളില്‍ മാത്രമാണു സര്‍വിസ്.

കണ്ണൂരില്‍ നിന്നു രാവിലെ 10ന് പുറപ്പെട്ട് പ്രാദേശിക സമയം ഉച്ചയ്ക്കു രണ്ടിന് ജിദ്ദയില്‍ എത്തിച്ചേരും. ജിദ്ദയില്‍ നിന്നു സഊദി സമയം രാവിലെ ആറിന് പുറപ്പെട്ട് ഉച്ചയ്ക്കു 02.15ന് കണ്ണൂരില്‍ എത്തിച്ചേരും. കണ്ണൂരില്‍ നിന്നു സഊദിയിലെ റിയാദിലേക്കു നിലവില്‍ നേരിട്ടു വിമാന സര്‍വിസുണ്ട്. ജിദ്ദയിലേക്കു സര്‍വിസ് ആരംഭിക്കുന്നത് ഇവിടെ നിന്നുള്ള ഉംറ തീര്‍ഥാടന യാത്രക്കാര്‍ക്കും പ്രയോജനകരമാകും