തിരുവനന്തപുരം: സ്‌കേറ്റിങ് പരിശീലനത്തിനിടെ കാറിടിച്ച് യുവാവ് മരിച്ചു. ശ്രീകാര്യം അമ്പാടി നഗര്‍ സ്വദേശി രാഹുല്‍ (24) ആണ് മരിച്ചത്. തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തിനു സമീപം ബുധനാഴ്ച രാത്രി ഏഴു മണിയോടെയാണ് സംഭവം.

സുഹൃത്തിനെ യാത്രയാക്കാനെത്തിയ ടെക്‌നോപാര്‍ക് ജീവനക്കാരി ഓടിച്ചിരുന്ന കാറാണ് ഇടിച്ചത്. സംഭവത്തില്‍ കഴക്കൂട്ടം പൊലീസ് കേസെടുത്തു. കാര്‍ അമിതവേഗതയിലായിരുന്നു. ഗുരുതരമായി പരുക്കേറ്റ രാഹുലിനെ അതേ കാറില്‍ തന്നെ തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

ഗ്രീന്‍ഫീല്‍ഡ് സ്റ്റേഡിയം റോഡില്‍ സ്ഥിരമായി സ്‌കേറ്റിങ് പരിശീലനത്തിന് എത്തുന്നയാളാണ് രാഹുല്‍.ഡെക്കറേഷന്‍ ജോലിക്കാരനായിരുന്നു രാഹുല്‍. അച്ഛന്‍: ഉണ്ണി കുറുപ്പ്, അമ്മ: ലത. സഹോദരന്‍ ഗോകുല്‍ (ആയുര്‍വേദ ഡോക്ടര്‍).