ചിറ്റൂര്‍: താലൂക്കിലെ നെല്ലിയാമ്പതി ഗ്രാമ പഞ്ചായത്തില്‍ ചെറുനെല്ലി പട്ടിക വര്‍ഗ്ഗ കോളനി നിവാസികള്‍ നേരിടുന്ന പ്രശ്‌നങ്ങള്‍ സംബന്ധിച്ച് ചെറുനെല്ലി കോളനിയില്‍ എം.എല്‍.എ കെ.ബാബുവിന്റെ നേതൃത്വത്തില്‍ അദാലത്ത് നടന്നു.
താമസ സൗകര്യം, വന്യ മൃഗ ഭീക്ഷണി, മലയിടിച്ചില്‍, കുട്ടികളുടെ പഠനം, ചികിത്സ, കുടിവെള്ളം തുടങ്ങിയവയുമായി ബന്ധപ്പെട്ട പ്രശ്‌നങ്ങളില്‍ പരിഹാരം വേണമെന്ന് അദാലത്തില്‍ കോളനി നിവാസികള്‍ ആവശ്യപ്പെട്ടു.
തങ്ങളുടെ ജീവിതശൈലിക്കനുയോജ്യമായ പരമ്പരാഗത തൊഴിലായ വിഭവ ശേഖരണം ഉള്‍പ്പെടുത്തിക്കൊണ്ടുള്ള പുനരധിവാസമാണ് ആവശ്യമെന്ന് കോളനി നിവാസികള്‍ എം.എല്‍.എക്കും ഉദ്യോഗസ്ഥര്‍ക്കും മുന്നില്‍ അറിയിച്ചു.
പ്രശ്‌നത്തില്‍ പഠനം നടത്തി ഉടന്‍ സര്‍ക്കാരിനെ അറിയിക്കുമെന്നും പരിഹാരമാര്‍ഗം കണ്ടെത്തുമെന്നും എം.എല്‍.എ ഉറപ്പു നല്‍കി.
പ്രധാന പ്രശ്‌നമായ പുനരധിവാസം സംബന്ധിച്ച് വിശദമായ റിപ്പോര്‍ട്ട് നല്‍കുന്നതിന് പാലക്കാട് ആര്‍.ഡി.ഒയ്ക്ക് ജില്ലാ കലക്ടര്‍ നിര്‍ദ്ദേശം നല്‍കി.