സ്വന്തം ലേഖകന്‍
തിരുവനന്തപുരം: സഹകരണ മേഖലയിലെ ക്രമക്കേടുകളും അഴിമതിയും തടയുന്നതിന് ശക്തമായ നടപടി സ്വീകരിക്കാന്‍ സഹകരണ വകുപ്പിന്റെ തീരുമാനം.
സാമ്പത്തിക ക്രമക്കേടുകള്‍, പണാപഹരണം, വായ്പാതട്ടിപ്പുകള്‍, സ്വര്‍ണപ്പണയ തട്ടിപ്പ് തുടങ്ങിയ ഗുരുതര ആരോപണങ്ങളുണ്ടായാല്‍ പ്രാഥമിക സ്ഥിരീകരണത്തിനു ശേഷം ക്രിമിനല്‍ കേസുകള്‍ ഫയല്‍ ചെയ്യും.
കുറ്റക്കാരുടെ സ്വത്തുക്കള്‍ വസ്തുക്കള്‍ മരവിപ്പിക്കുന്നതിന് ആവശ്യമായ പുതിയ വകുപ്പുകള്‍ സഹകരണ നിയമത്തില്‍ കൂട്ടിച്ചേര്‍ക്കും. നിയമപരിഷ്‌ക്കരണത്തിനായി നിയോഗിച്ച സമിതിയോട് ഇക്കാര്യം ആവശ്യപ്പെടും. ദേദഗതികളോടു കൂടിയ കരടുനിയമം രണ്ടുമാസത്തിനകം അംഗീകാരത്തിന് ലഭ്യമാക്കും.

സംസ്ഥാനത്തെ മുഴുവന്‍ സംഘങ്ങളിലും ദ്രുതപരിശോധന നടത്തി ക്രമക്കേടുകളുണ്ടെങ്കില്‍ സത്വര നടപടി സ്വീകരിക്കാന്‍ സഹകരണ സംഘം രജിസ്ട്രാറെ ചുമതലപ്പെടുത്തി.
കരുവന്നൂര്‍ ബാങ്കിന്റെ കാര്യത്തില്‍ സര്‍ക്കാര്‍ നിയോഗിച്ച അന്വേഷണസമിതി ഉത്തരവാദികളെന്നു കണ്ടെത്തുന്ന മുഴുവന്‍ ഉദ്യോഗസ്ഥര്‍ക്കുമെതിരേ നടപടിയുണ്ടാവും. കരുവന്നൂര്‍ ബാങ്കിലെ നിക്ഷേപകര്‍ക്കും ഇടപാടുകാര്‍ക്കും ഉണ്ടായ ആശങ്കയും അരക്ഷിതാവസ്ഥയും പരിഹരിക്കും. ഇതിനായി ഇപ്പോള്‍ നിയോഗിച്ചിട്ടുള്ള മൂന്നംഗ അഡ്മിനിസ്‌ട്രേറ്റീവ് കമ്മിറ്റിയുടെ സഹായത്തോടെ പുനരുദ്ധാരണ പാക്കേജ് തയാറാക്കി മൂന്നാഴ്ചയ്ക്കകം സര്‍ക്കാരിന്റെ അംഗീകാരത്തിനായി സമര്‍പ്പിക്കും.

സഹകരണ വിജിലന്‍സിന്റെ പ്രവര്‍ത്തനം ശക്തിപ്പെടുത്തും. ക്രിമിനല്‍ സ്വഭാവമുള്ള കേസുകള്‍ ശ്രദ്ധയില്‍പ്പെട്ടാല്‍ പൊലിസിനോ മറ്റു അന്വേഷണ ഏജന്‍സികള്‍ക്കോ റിപ്പോര്‍ട്ട് ചെയ്യുന്നതിനായി സഹകരണസംഘം നിയമത്തിലെ 65, 66 വകുപ്പുകള്‍ ഭേദഗതി ചെയ്യും.
250 കോടിക്ക് മുകളില്‍ പ്രവര്‍ത്തന മൂലധനമുള്ള സംഘങ്ങളെ ഒരു ഗ്രൂപ്പാക്കി മൂന്ന് ഓഡിറ്റര്‍മാര്‍ അടങ്ങുന്ന ടീം രൂപീകരിച്ച് കണക്കുകള്‍ പരിശോധിക്കും. ഇതിന്റെ മേല്‍നോട്ടം ജില്ലാതല ജോയിന്റ് ഡയരക്ടര്‍മാര്‍, അസി. ഡയരക്ടര്‍മാര്‍ എന്നിവര്‍ക്കായിരിക്കും. സഹകരണ സംഘത്തിലെ ജീവനക്കാരുടെ ജോലി സംബന്ധിച്ചും ഉദ്യോഗസ്ഥരുടെ സ്ഥലംമാറ്റത്തിനും കൃത്യമായ മാനദണ്ഡം നിശ്ചയിക്കും. ജോലിക്രമീകരണ വ്യവസ്ഥ റദ്ദാക്കി ഉദ്യോഗസ്ഥരെ അടിയന്തരമായി ജില്ലകളിലേക്ക് തിരിച്ചയക്കാനും തീരുമാനമായിട്ടുണ്ട്.