തിരുവനന്തപുരം: കോണ്‍ഗ്രസ് അധ്യക്ഷ തെരഞ്ഞെടുപ്പില്‍ വിജയപ്രതീക്ഷ പ്രകടിപ്പിച്ച് ശശി തരൂര്‍. യുവാക്കളുടെ വോട്ട് അനുകൂലമാവുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.

ഇന്ന് കോണ്‍ഗ്രസ് പ്രവര്‍ത്തകരുടെ ദിനമാണ്. നല്ല പ്രതീക്ഷ. പാര്‍ട്ടിക്കകത്ത് നല്ല വിധത്തിലുള്ള ഇളക്കമുണ്ടായി.ഈ തെരഞ്ഞെടുപ്പ് പാര്‍ട്ടിക്ക് ഗുണം ചെയ്യും. അണികള്‍ ഉണര്‍ന്നു. തെരഞ്ഞെടുപ്പ് നല്ല തുടക്കമാവട്ടെ- തരൂര്‍ മാധ്യമപ്രവര്‍ത്തകരോട് പ്രതികരിച്ചു. ഗാന്ധി കുടുംബത്തെ കുറിച്ച് ഒരു പരാതിയുമില്ല. തെരഞ്ഞെടുപ്പ് നിഷ്പക്ഷമാണെന്നാണ് അവര്‍ തുടക്കം മുതല്‍ പറഞ്ഞത്. അവരെ കുറിച്ച് ഒരു മോശവും പറയാനില്ല. വേറെ ചില നേതാക്കളുടെ നിലപാട് തന്നെ വേദനിപ്പിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. തെരഞ്ഞെടുപ്പ് പാര്‍ട്ടിക്ക് ഗുണം ചെയ്യുമെന്ന് പ്രിയങ്ക തന്നോട് പറഞ്ഞതായും അദ്ദേഹം വ്യക്തമാക്കി. ആദ്യ വോട്ടറായ തമ്പാനൂര്‍ രവി തനിക്ക് പരസ്യ വോട്ട് പ്രഖ്യാപിച്ചിട്ടുണ്ടെന്നും അതില്‍ ഏറെ സന്തോഷമെന്നും അദ്ദേഹം ചൂണ്ടിക്കാട്ടി.

പാര്‍ട്ടിയുടെ ഗുണത്തിനാണ് താന്‍ മത്സരരംഗത്തിറങ്ങിയതെന്നും അദ്ദേഹം ആവര്‍ത്തിച്ചു. 'അടുത്ത ലോക്‌സഭാ തെരഞ്ഞെടുപ്പിനെ നേരിടാന്‍ പാര്‍ട്ടിക്ക് ഒരു പുതിയ ഊര്‍ജ്ജം ആവശ്യമുണ്ട്. എന്റെ സ്ഥാനത്തിനു വേണ്ടിയല്ല മത്സരിക്കുന്നത്. പാര്‍ട്ടിക്കും രാജ്യത്തിനും വേണ്ടിയാണ്. രാജ്യത്തിന് ഒരു ശക്തമായ കോണ്‍ഗ്രസിന്റെ ആവശ്യമുണ്ട്' അദ്ദേഹം ചൂണ്ടിക്കാട്ടി.

ചെയ്യാനാവുന്നതെല്ലാം ചെയ്തു. ഇനി പ്രവര്‍ത്തകര്‍ തീരുമാനിക്കട്ടെയെന്നും തരൂര്‍ വ്യക്തമാക്കി. ഖാര്‍ഗെയുമായി ഫോണില്‍ സംസാരിച്ചതായും അദ്ദേഹം അറിയിച്ചു. ട്രെയിനി പരാമര്‍ശത്തിന് മറുപടി പറയുന്നില്ലെന്നും മാധ്യമ പ്രവര്‍ത്തകരുടെ ചോദ്യത്തിന് അദ്ദേഹം പ്രതികരിച്ചു.

കോണ്‍ഗ്രസ് അധ്യക്ഷ സ്ഥാനത്തേക്കുള്ള തെരഞ്ഞെടുപ്പ് തുടങ്ങി. രാവിലെ പത്ത് മുതല്‍ വൈകീട്ട് നാല് വരെയാണ് വോട്ടെടുപ്പ്. ഏറെ ആകാംക്ഷയോടെയാണ് രാജ്യം തെരഞ്ഞെടുപ്പ് ഉറ്റു നോക്കുന്നത്. ഖാര്‍ഗെ കര്‍ണ്ണാടകത്തിലും, തരൂര്‍ കേരളത്തിലും വോട്ട് ചെയ്യുന്നത്.

എഐസിസിയിലും, പി സി സി കളിലുമായി 67 ബൂത്തുകളും, ഭാരത് ജോഡോ യാത്രയില്‍ ഒരു ബൂത്തുമാണ് സജ്ജീകരിച്ചിരിക്കുന്നത്. 9308 വോട്ടര്‍മാരാണുള്ളത്. രഹസ്യ ബാലറ്റിലൂടെയാണ് വോട്ടെടുപ്പ്. ബാലറ്റ് പേപ്പറ്റില്‍ ആദ്യം മല്ലികാര്‍ജ്ജുന്‍ ഖാര്‍ഗെയുടെ പേരും, രണ്ടാമത് തരൂരിന്റെ പേരുമാണ് ഉള്ളത്. വോട്ടെടുപ്പിന് ശേഷം ബാലറ്റ് പെട്ടികള്‍ ഡല്‍ഹിയിലെത്തിക്കും. ബുധനാഴ്ച വോട്ടെണ്ണി ഫലം പ്രഖ്യാപിക്കും.