ഡല്‍ഹി: കോണ്‍ഗ്രസ് അധ്യക്ഷ തെരഞ്ഞെടുപ്പ് ഫലം നാളെ പ്രഖ്യാപിക്കും. തികഞ്ഞ വിജയ പ്രതീക്ഷയിലാണ് സ്ഥാനാര്‍ഥികളായ മല്ലികാര്‍ജുന്‍ ഖാര്‍ഗെയും ശശി തരൂരും. 22 വര്‍ഷത്തിന് ശേഷം നടന്ന പാര്‍ട്ടി അധ്യക്ഷ തെരഞ്ഞെടുപ്പ് കുറ്റമറ്റരീതിയില്‍ പൂര്‍ത്തിയാക്കാന്‍ സാധിച്ചതിന്റെ സംതൃപ്തിയിലാണ് കോണ്‍ഗ്രസ്.

പോളിംഗില്‍ സൂക്ഷിച്ച രഹസ്യസ്വഭാവം നാളത്തെ വോട്ടെണ്ണലിലും ഉണ്ടാകുമെന്ന് തെരഞ്ഞെടുപ്പ് സമിതി ചെയര്‍മാന്‍ മധുസൂദന്‍ മിസ്ത്രി വ്യക്തമാക്കിയിട്ടുണ്ട്. 68 ബൂത്തുകളിലെയും സീല്‍ ചെയ്ത ബാലറ്റ് പെട്ടികള്‍ വൈകിട്ടോടെ ഡല്‍ഹി എ.ഐ.സി.സി ആസ്ഥാനത്ത് പ്രദേശ് റിട്ടേണിംഗ് ഓഫിസര്‍മാര്‍ എത്തിക്കും. ഓരോ പെട്ടിയും തുറന്ന ശേഷം മുഴുവന്‍ ബാലറ്റ് പേപ്പറുകളും ആവര്‍ത്തിച്ച് ഇട കലര്‍ത്തും. എന്നിട്ടേ അടുത്ത പെട്ടി തുറക്കൂ. അതുവഴി വോട്ട് ചെയ്ത ആളെയോ അത് ലഭിച്ച സംസ്ഥാനമോ തിരിച്ചറിയാന്‍ കഴിയില്ല.

അപ്രഖ്യാപിതമെങ്കിലും പാര്‍ട്ടി ദേശീയ നേതൃത്വത്തിന്റെ പിന്തുണയാണ് മല്ലികാര്‍ജുന്‍ ഖാര്‍ഗെയുടെ ബലം. എന്നാല്‍ രഹസ്യ ബാലറ്റിലാണ് ശശി തരൂരിന്റെ പ്രതീക്ഷ . തെരഞ്ഞെടുപ്പ് പ്രഖ്യാപിച്ച ഘട്ടത്തില്‍ നിന്ന് ബലാബലത്തില്‍ കാര്യമായ മാറ്റം വരുത്താന്‍ തരൂരിന് കഴിഞ്ഞു എന്നാണ് പൊതുവിലയിരുത്തല്‍.