കോഴിക്കോട്: അന്തരിച്ച പാണക്കാട് സയ്യിദ് ഹൈദരലി ശിഹാബ് തങ്ങളുടെ പേരില്‍ രൂപീകരിച്ച ഫൗണ്ടേഷന്‍ ചെയര്‍മാനായി ഹൈദരലി തങ്ങളുടെ മകനും യൂത്ത് ലീഗ് ദേശീയ വൈസ് പ്രസിഡന്റുമായ പാണക്കാട് മുഈനലി തങ്ങളെ തിരഞ്ഞെടുത്തു.

ലീഗ് മുന്‍ സംസ്ഥാന സെക്രട്ടറി കെ.എസ് ഹംസയാണ് കണ്‍വീനര്‍. മികച്ച സാമൂഹിക പ്രവര്‍ത്തകക്കുള്ള ഫൗണ്ടേഷന്റെ പ്രഥമ ഹൈദരലി തങ്ങള്‍ പുരസ്‌കാരം ദയാബായിക്ക് നല്‍കുമെന്ന് ഭാരവാഹികള്‍ അറിയിച്ചു.

എം.എസ്.എഫ് മുന്‍ സംസ്ഥാന ജനറല്‍ സെക്രട്ടറി ലത്തീഫ് തുറയൂര്‍, പി.പി ഷൈജല്‍, എ.പി അബ്ദുസ്സമദ് തുടങ്ങി 50ഓളം പേര്‍ കെ.പി കേശവമേനോന്‍ ഹാളില്‍ നടന്ന യോഗത്തില്‍ പങ്കെടുത്തു. ഹൈദരലി ശിഹാബ് തങ്ങളുടെ സ്മരണ നിലനിര്‍ത്തുന്നതിനായി രൂപീകരിക്കുന്ന കൂട്ടായ്മയാണിതെന്നും ഫൗണ്ടേഷന്റെ നേതൃത്വത്തില്‍ വിദ്യാഭ്യാസ പ്രവര്‍ത്തനങ്ങളും യുവാക്കള്‍ക്ക് തൊഴില്‍ പരിശീലനവും നല്‍കുമെന്നും കണ്‍വീനര്‍ കെ.എസ് ഹംസ പറഞ്ഞു.