ന്യൂഡൽഹി • കല്ലുവാതുക്കൽ മദ്യ ദുരന്തക്കേസിൽ തടവ് ശിക്ഷ അനുഭവിക്കുന്ന മണിച്ചനെ ഉടൻ വിട്ടയക്കാൻ സുപ്രിംകോടതി ഉത്തരവ്. 30 ലക്ഷത്തിലധികം വരുന്ന പിഴയടച്ചാൽ മാത്രമേ വിട്ടയക്കാനാകൂവെന്ന സംസ്ഥാന സർക്കാർ വാദം ജസ്റ്റിസുമാരായ അനിരുദ്ധ ബോസ്, വിക്രം നാഥ് എന്നിവരടങ്ങിയ ബെഞ്ച് തള്ളി. മണിച്ചനെ ഉടൻ ജയിൽ മോചിതനാക്കണമെന്നും കോടതി ഉത്തരവിട്ടു. പിഴ അടക്കാത്തതിന്റെ പേരിൽ മോചനം നിഷേധിക്കാൻ കഴിയില്ലെന്ന് ബെഞ്ച് വ്യക്തമാക്കി.

വ്യാജ മദ്യം തടയാൻ കഴിയാത്ത സർക്കാരിന് ഇരകൾക്കുള്ള നഷ്ടപരിഹാരം നൽകിക്കൂടെയെന്നും കോടതി വാക്കാൽ ആരാഞ്ഞു. കേസിലെ പ്രതികൾക്ക് വിധിച്ച പിഴ സുപ്രിംകോടതി ശരിവച്ചിട്ടുണ്ടെന്ന് സംസ്ഥാന സർക്കാറിന്റെ സ്റ്റാൻഡിങ് കോൺസൽ ഹർഷദ് വി ഹമീദ് ചൂണ്ടിക്കാട്ടി.

പിഴ തുക കേസിലെ ഇരകൾക്ക് നഷ്ടപരിഹാരമായി നൽകേണ്ടതാണെന്നും സംസ്ഥാന സർക്കാർ വാദിച്ചു. എന്നാൽ പിഴ നൽകാൻ പണമില്ലെങ്കിൽ എത്രകാലം ജയിലിൽ ഇടേണ്ടി വരുമെന്ന് കോടതി തിരിച്ചു ചോദിച്ചു. വ്യാജമദ്യം തടയുന്നതിൽ പരാജയപ്പെട്ടത് സർക്കാർ അല്ലേയെന്നും അതിനാൽ ഇരകൾക്ക് സർക്കാറിന് നഷ്ടപരിഹാരം നൽകിക്കൂടെയെന്നുമായിരുന്നു കോടതിയുടെ ചോദ്യം.
മണിച്ചന്റെ മോചനം സംബന്ധിച്ച് നാലാഴ്ചയ്ക്കുള്ളിൽ തീരുമാനമെടുക്കണമെന്ന് സുപ്രിംകോടതി മെയ് 20ന് നിർദേശിച്ചിരുന്നു. ഇതനുസരിച്ച് സംസ്ഥാന മന്ത്രിസഭാ യോഗം മണിച്ചനെ മോചിപ്പിക്കാൻ നൽകിയ ശുപാർശയിൽ ഗവർണർ ആരിഫ് മുഹമ്മദ് ഖാൻ ഒപ്പുവച്ചിരുന്നു. കേസിലെ ഏഴാംപ്രതിയായ മണിച്ചന് ജീവപര്യന്തവും 30.45 ലക്ഷം രൂപയുമാണ് വിചാരണക്കോടതി ശിക്ഷ വിധിച്ചിരുന്നത്. ഈ പിഴ അടക്കാതെ മോചനം സാധ്യമാകില്ലെന്നായിരുന്നു സംസ്ഥാന സർക്കാരിന്റെ ഉത്തരവിലുണ്ടായിരുന്നത്.

എന്നാൽ പിഴയടയ്ക്കാൻ മണിച്ചൻ തയാറാകാതിരുന്നതോടെ മോചനം നീളുകയായിരുന്നു. ഇതിനെ ചോദ്യം ചെയ്ത് മണിച്ചന്റെ ഭാര്യ ഉഷയാണ് സുപ്രിംകോടതിയെ സമീപിച്ചത്.
2000 ഒക്ടോബർ 21 ന് ഉണ്ടായ കല്ലുവാതുക്കൽ മദ്യദുരന്തത്തിൽ 31 പേർ മരിക്കുകയും ആറുപേർക്ക് കാഴ്ച നഷ്ടമാവുകയും 500 പേർ ചികിത്സ തേടുകയും ചെയ്തിരുന്നു.
വീട്ടിലെ ഭൂഗർഭ അറകളിലാണ് മണിച്ചൻ വ്യാജമദ്യം സൂക്ഷിച്ചിരുന്നത്. വീര്യം കൂട്ടാൻ വിഷസ്പിരിറ്റ് കലർത്തിയതാണ് ദുരന്തകാരണം. മണിച്ചനും കൂട്ടു പ്രതികളും ജീവപര്യന്തം ശിക്ഷിക്കപ്പെട്ടു.
കൂട്ടുപ്രതി ഹൈറുന്നീസ 2009 ൽ ശിക്ഷയ്ക്കിടെ മരിച്ചു. മണിച്ചൻ 20 വർഷം തടവ് പൂർത്തിയാക്കി. മണിച്ചന്റെ സഹോദരന്മാർക്ക് ശിക്ഷയിളവ് നൽകി നേരത്തെ സുപ്രിംകോടതി മോചിപ്പിച്ചിരുന്നു.