കോഴിക്കോട്: സന്തോഷ് ട്രോഫി ഫുട്ബോൾ പോരാട്ടത്തിന്റെ ഫൈനൽ റൗണ്ട് ബർത്ത് ഉറപ്പാക്കി കേരളം. ​യോ​ഗ്യതാ റൗണ്ടിൽ മറുപടിയില്ലാത്ത 18 ​ഗോളടിച്ചു കൂട്ടിയാണ് കേരളത്തിന്റെ തകർപ്പൻ മുന്നേറ്റം. ഇന്ന് പോണ്ടിച്ചേരിയെ മറുപടിയില്ലാത്ത 7 ​ഗോളുകൾക്ക് കേരളം തോൽപ്പിച്ചത്. കഴിഞ്ഞ മത്സരത്തിൽ മറുപടിയില്ലാത്ത 10 ​ഗോളിനു കേരളം ലക്ഷദ്വീപിനെ തോൽപ്പിച്ചിരുന്നു.

പോണ്ടിച്ചേരിക്കെതിരായ പോരാട്ടത്തിൽ ഇ സജീഷ്, നസീബ് റഹ്മാൻ എന്നിവർ ഇരട്ട ​ഗോളുകൾ നേടി. ഹൈദരാബാദിൽ ഡിസംബറിലാണ് സന്തോഷ് ട്രോഫി ഫൈനൽ റൗണ്ട് മത്സരങ്ങൾ നടക്കുക.ഇന്ന് സമനില മതിയായിരുന്നു കേരളത്തിനു ഫൈനൽ റൗണ്ട് ഉറപ്പിക്കാൻ. എന്നാൽ ആധികാരിക വിജയത്തിലൂടെയാണ് കേരളം മൂന്നിൽ മൂന്ന് മത്സരങ്ങളും ജയിച്ച് ഫൈനൽ റൗണ്ടിലേക്ക് മുന്നേറിയത്.പോണ്ടിച്ചേരിക്കെതിരായ പോരാട്ടത്തിൽ 11ാം മിനിറ്റിലാണ് കേരളം ​ഗോളടി ആരംഭിച്ചത്. 11ാം മിനിറ്റിൽ ലഭിച്ച പെനാൽറ്റി വലയിലാക്ക് ​ഗനി അഹമ്മദ് നി​ഗം ആണ് ​ഗോൾ വേട്ടക്ക് തുടക്കമിട്ടത്.

രണ്ടാം ഗോള്‍ 14ാം മിനിറ്റില്‍. നസീബാണ് സ്‌കോറര്‍. മൂന്നാം ഗോള്‍ 20ാം മിനിറ്റിലെത്തി. സജീഷായിരുന്നു സ്‌കോറര്‍. ശേഷിച്ച നാല് ഗോളുകള്‍ രണ്ടാം പകുതിയിലായിരുന്നു. 53ാം മിനിറ്റില്‍ ക്രിസ്റ്റിയാണ് നാലാം ഗോള്‍ വലയിലാക്കിയത്. നസീബ് 64ലും സജീഷ് 67ലും തങ്ങളുടെ രണ്ടാം ഗോള്‍ നേടി. 71ാം മിനിറ്റില്‍ ഷിജിന്‍ കേരളത്തിൻ്റേ പട്ടിക പൂര്‍ത്തിയാക്കി.