കാബൂള്‍: അഫ്ഗാനിസ്ഥാനിലെ തന്ത്രപ്രധാന മേഖലകള്‍ പിടിച്ചടക്കി ആക്രമണം തുടരുന്ന താലിബാന്‍ ഇന്ന് ഖുന്‍ദുസ് പിടിച്ചെടുത്തു. ഇത് മൂന്നാമത്തെ പ്രവിശ്യാ ആസ്ഥാനമാണ് മൂന്നു ദിവസത്തിനിടെ പിടിച്ചെടുത്തിരിക്കുന്നത്.

ഖുന്‍ദുസിലെ പൊലിസ് ആസ്ഥാനവും ഗവര്‍ണറുടെ കോംപൗണ്ടും ജയിലും തങ്ങളുടെ കൈയ്യിലായെന്ന് താലിബാന്‍ പ്രഖ്യാപിച്ചു.

ഇന്നലെ ഉച്ചയ്ക്ക് ശേഷം സര്‍ക്കാര്‍ സേനയുമായി വലിയ സംഘട്ടനമാണ് ഉണ്ടായതെന്നും സൈനിക കേന്ദ്രവും വിമാനത്താവളവും ഒഴികെയുള്ള എല്ലാ സര്‍ക്കാര്‍ സ്ഥാപനങ്ങളും താലിബാന് കീഴിലായെന്നും ഖുന്‍ദുസ് പ്രവിശ്യന്‍ അസംബ്ലി അംഗം അംറുദ്ദീന്‍ വാലി പറഞ്ഞു.

പ്രദേശത്തുനിന്ന് കുട്ടികളും സ്ത്രീകളും അടക്കം 14 പേരുടെ മൃതദേഹം കണ്ടെത്തിയെന്ന് ഖുന്‍ദുസ് ആരോഗ്യവകുപ്പ് വ്യക്തമാക്കി. 30 ലേറെ പേരെ പരുക്കുകളോടെ ആശുപത്രിയില്‍ പ്രവേശിപ്പിച്ചു.

കഴിഞ്ഞ മൂന്നു ദിവസത്തിനിടെ നിംറുസ്, ജൗസ്ജാന്‍ പ്രവിശ്യകള്‍ താലിബാന്‍ പിടിച്ചെടുത്തിരുന്നു.