ഗൂഗിള്‍ മാപ് നോക്കി പോവുന്നതിനിടെ കാര്‍ പുഴയില്‍ വീണു; രണ്ട് ഡോക്ടര്‍മാര്‍ മരിച്ചു, മൂന്ന് പേരെ രക്ഷപ്പെടുത്തി

എറണാകുളം: പറവൂര്‍ ഗോതുരുത്തില്‍ അഞ്ചംഗ സംഘം സഞ്ചരിച്ചിരുന്ന കാര്‍ പുഴയിലേക്ക് മറിഞ്ഞ് രണ്ട് ഡോക്ടര്‍മാര്‍ മരിച്ചു. കൊടുങ്ങല്ലൂര്‍ സ്വകാര്യ ആശുപത്രിയിലെ ഡോക്ടര്‍മാരായ അജ്മല്‍, അദ്വൈത് എന്നിവരാണ് മരിച്ചത്. കൂടെയുണ്ടായിരുന്ന മറ്റ് മൂന്നുപേരെ രക്ഷപ്പെടുത്തി. ഇവരുടെ ആരോഗ്യനില തൃപ്തികരമാണ്. എറണാകുളം ഗോതുരുത്ത് കടല്‍വാതുരുത്തില്‍ കാര്‍ പുഴയിലേക്ക് മറിഞ്ഞാണ് അപകടം.

ഇന്നലെ രാത്രി 12:30 യോടെ കൊടുങ്ങല്ലൂരില്‍ നിന്ന് എറണാകുളത്തേക്ക് വരികയായിരുന്ന കാറാണ് അപകടത്തില്‍പ്പെട്ടത്. അമിതവേഗത്തിലായിരുന്ന കാര്‍ പുഴയിലേക്ക് മറിയുകയായിരുന്നെന്ന് ദൃക്‌സാക്ഷികള്‍ പറഞ്ഞു.

ഗൂഗിള്‍ മാപ് നോക്കിയായിരുന്നു യാത്രയെന്ന് പൊലിസ് വ്യക്തമാക്കി. പരിചയക്കുറവുള്ള സ്ഥലമായതിനാല്‍ അപകടത്തില്‍ പെടുകയായിരുന്നു. കൊച്ചിയില്‍ പാര്‍ട്ടി കഴിഞ്ഞ് മടങ്ങുകയായിരുന്നു സംഘം. ഉടന്‍ തന്നെ നാട്ടുകാരും ഫയര്‍ഫോഴ്‌സും രക്ഷാപ്രവര്‍ത്തനം നടത്തിയെങ്കിലും രണ്ടുപേരെ രക്ഷിക്കാനായില്ല.