കോഴിക്കോട്: സംസ്ഥാനത്ത് കാലങ്ങളായി സഹകരണ വകുപ്പ് നടത്തിവരുന്ന ഓണച്ചന്തയ്ക്ക് ഇത്തവണ 'ഓണം, മുഹറം ചന്ത' എന്ന് പേരിട്ടതിനെ പരിഹസിച്ച് സോഷ്യല്‍ മീഡിയ. പേരുമാറ്റം ബാലന്‍സിങ്ങിനാണെന്നും ഇതില്‍ എന്തോ പന്തികേടുണ്ടെന്നുമാണ് സമൂഹ മാധ്യമങ്ങളുടെ കണ്ടെത്തല്‍. കേരളത്തിലെ മുസ്‌ലിംകള്‍ ആഘോഷിക്കാത്ത മുഹറം അനാവശ്യമായി വലിച്ചിട്ട് സര്‍ക്കാര്‍ സാമുദായിക പ്രീണനത്തിന് ശ്രമിക്കുകയാണെന്നാണ് പ്രധാന ആരോപണം.
ചെറിയ പെരുന്നാളും ബലി പെരുന്നാളുമാണ് മുസ്‌ലിംകളുടെ രണ്ടു ആഘോഷങ്ങള്‍. മുഹറം 9,10 ദിവസങ്ങളില്‍ വ്രതമെടുക്കാറുണ്ടെന്നല്ലാതെ കേരളത്തിലെ മുസ്‌ലിംകള്‍ മറ്റ് ആഘോഷങ്ങളൊന്നും നടത്താറില്ല. യാര്‍ഥാര്‍ഥ്യം ഇങ്ങനെയായിരിക്കെ എന്തിനാണ് മുഹറത്തിന്റെ പേരില്‍ ഒരു ചന്ത സംഘടിപ്പിക്കുന്നത് എന്നാണ് സാമൂഹ മാധ്യമങ്ങളുടെ ചോദ്യം. സ്‌കോളര്‍ഷിപ്പ്, സംവരണം അടക്കമുള്ള വിഷയങ്ങളില്‍ മുസ്‌ലിംകള്‍ക്ക് എതിരായ തീരുമാനമെടുത്ത സര്‍ക്കാര്‍, മുഹറം ചന്ത സംഘടിപ്പിക്കുന്നത് ദുരുദ്ദേശ്യപരമാണ്. മുസ്‌ലിം സമുദായത്തിനുള്ള സ്‌കോളര്‍ഷിപ്പ് മറ്റുള്ളവര്‍ക്കുകൂടി വീതംവച്ചതു പോലെയുള്ള ബാലന്‍സിങ്ങാണിതെന്നും പലരും ചൂണ്ടിക്കാട്ടുന്നു.
വിഷു കഴിഞ്ഞ ഉടന്‍ ലോക്ക് ഡൗണ്‍ പ്രഖ്യാപിച്ച സര്‍ക്കാര്‍ ചെറിയ പെരുന്നാളിനും ബലി പെരുന്നാളിനും ഇളവുകള്‍ നല്‍കിയിരുന്നില്ല. ഈ സാഹചര്യത്തില്‍ ഓണത്തോടനുബന്ധിച്ച് കൂടുതല്‍ ഇളവുകള്‍ നല്‍കി എന്ന ആക്ഷേപമുണ്ടാവുമെന്ന നിഗമനത്തില്‍ അതിനെ പ്രതിരോധിക്കാനാണ് നാളിതുവരെയില്ലാത്ത വിധം ഓണം മുഹറം ചന്ത സംഘടിപ്പിക്കലിന്റെ പിന്നിലെ തന്ത്രമെന്നാണ് വിലയിരുത്തല്‍. ആഘോഷമില്ലാത്ത മുഹറത്തിന്റെ പേരില്‍ ചന്ത ആരംഭിക്കേണ്ടതില്ലെന്ന് പറയുന്ന സോഷ്യല്‍ മീഡിയ, ഓണച്ചന്ത അത്യാവശ്യമാണെന്നും പറയുന്നു. ഓണച്ചന്ത എന്ന് മാത്രം പേരുനല്‍കിയാലും സാധനങ്ങള്‍ വാങ്ങാന്‍ എല്ലാ വിഭാഗം ജനങ്ങളും പോകുമെന്നും സ്‌കോളര്‍ഷിപ്പിലില്ലാത്ത 'സ്‌നേഹം' ചന്തയില്‍വേണോയെന്നും സോഷ്യമീഡിയ തുറന്നടിക്കുന്നു. ഇളവുകള്‍ നല്‍കി കൊവിഡ് വ്യാപനമുണ്ടായാല്‍ മുഹറത്തേയും പഴിചാരാമെന്നതാണ് പേരുമാറ്റത്തിന്റെ പിന്നിലെന്നാണ് ചിലരുടെ കണ്ടുപിടിത്തം. അതിനാല്‍ മുഹറം ചന്ത വേണ്ടെന്നും ഇവര്‍ വാദിക്കുന്നു.