കനത്തമഴ: മലപ്പുറത്ത് മണ്ണിടിച്ചില്‍, ആളുകളെ മാറ്റി, തിരുവനന്തപുരത്ത് നാശനഷ്ടം

മലപ്പുറം: മലപ്പുറം ജില്ലയില്‍ ശക്തമായ മഴ തുടരുന്നു. മഞ്ചേരി പുല്ലഞ്ചേരി വേട്ടേക്കോട് ഒടുവങ്ങാട് റോഡില്‍ മണ്ണിടിച്ചല്‍ ഉണ്ടായി. സമീപത്ത് താമസിക്കുന്ന എട്ട് കുടുംബങ്ങളെ മാറ്റിപ്പാര്‍പ്പിച്ചു. ജാഗ്രതയുടെ ഭാഗം ആയാണ് ആളുകളെ മാറ്റിയത്. തിരുവനന്തപുരത്ത് കനത്ത മഴയില്‍ നാശനഷ്ടം ഉണ്ടായിട്ടുണ്ട്. വീടുകള്‍ക്ക് കേടുപാടുകള്‍ സംഭവിച്ചു.

അതേസമയം കനത്ത മഴ തുടരുന്ന സാഹചര്യത്തില്‍ എട്ട് ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചു. പത്തനംതിട്ട, കോട്ടയം, എറണാകുളം, മലപ്പുറം, കോഴിക്കോട്, വയനാട്, കണ്ണൂര്‍ കാസര്‍ഗോഡ് ജില്ലകളില്‍ ആണ് അലേര്‍ട്ട് പ്രഖ്യാപിച്ചത്. നേരത്തെ അഞ്ച് ജില്ലകളില്‍ ആയിരുന്നു ഇന്ന് മുന്നറിയിപ്പ് നല്‍കിയിരുന്നത്. അറബിക്കടലിലെ ന്യൂന മര്‍ദ്ദം കാരണം ഇന്ന് വടക്കന്‍ കേരളത്തില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത ഉണ്ടെന്ന് നേരത്തെ അറിയിപ്പ് ഉണ്ടായിരുന്നു.

നാളെ പത്തനംതിട്ട, ആലപ്പുഴ, എറണാകുളം എന്നീ ജില്ലകളില്‍ കാലാവസ്ഥ വകുപ്പ് യെല്ലോ അലേര്‍ട്ട് പ്രഖ്യാപിച്ചിട്ടുണ്ട്. ഒറ്റപ്പെട്ട ശക്തമായ മഴയ്ക്ക് സാധ്യത ഉണ്ടെന്നാണ് കാലാവസ്ഥ വകുപ്പ് പ്രവചിച്ചത്. മഴ ശക്തി പ്രാപിക്കാന്‍ സാധ്യതയുള്ള മലയോര/ തീരദേശ മേഖലയില്‍ പ്രത്യേക ജാ?ഗ്രത വേണമെന്നും അറിയിപ്പുണ്ട്.