തൃശ്ശൂര്‍: കഴിഞ്ഞ ദിവസം തൃശ്ശൂരില്‍ പിടിയിലായ മൂന്ന് എം.ഡി.എം.എ പ്രതികളില്‍ നിന്ന് എക്‌സൈസ് ഉദ്യോഗസ്ഥര്‍ കണ്ടെടുത്തത് ലഹരി വാങ്ങാനെത്തുന്ന വിദ്യാര്‍ഥികളുടേതുള്‍പ്പെടെ നീണ്ട ലിസ്റ്റ്. പേര് വിവരവും പണം തരാനുള്ളതിന്റെയും തന്നതിന്റെയും വിവരങ്ങളാണ് ഇവരുടെ ലിസ്റ്റിലുള്ളത്.

ചെന്ത്രാപ്പിന്നി സ്വദേശി കേരള ബ്രോ എന്നറിയപ്പെടുന്ന ജിനേഷ് , കൈപ്പമംഗലം സ്വദേശി വിഷ്ണു എന്നിവരെയാണ് എക്‌സൈസ് അറസ്റ്റ് ചെയ്തത്. 15.2 ഗ്രാം മാരക ലഹരിമരുന്നായ എം.ഡി.എം.എയുമായാണ് പ്രതികള്‍ എക്‌സൈസിന്റെ പിടിയിലായത്. ഇവര്‍ ബെംഗളൂരുവില്‍ നിന്ന് നേരിട്ട് വാങ്ങി വിദ്യാര്‍ഥികള്‍ക്ക് വിതരണം ചെയ്യുകയാണെന്ന് എക്‌സൈസ് ഉദ്യോഗസ്ഥര്‍ പറഞ്ഞു.എം.ഡി.എം.എ വാങ്ങിയ കുട്ടികളെ കണ്ടെത്താന്‍ ശ്രമം തുടങ്ങിയെന്ന് എക്‌സൈസ് അറിയിച്ചു.

1000 മുതല്‍ നാലായിരം അയ്യായിരം രൂപയ്ക്ക് വരെ ലഹരി വസ്തുക്കള്‍ ഇവരില്‍ നിന്ന് വാങ്ങിയ കുട്ടികളുണ്ടെന്ന് ലിസ്റ്റില്‍ നിന്ന് വ്യക്തമാവുന്നുണ്ട്.

രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് പ്രതികളെ പിടികൂടാനായത്. ലഹരി ഇടപാടിനായി ഉപയോഗിച്ച വാഹനവും പിടിച്ചെടുത്തിട്ടുണ്ട്.