തെഹ്‌റാന്‍: തെക്കന്‍ ഇറാനിലെ ഷിറാസ് നഗരത്തിലെ പ്രമുഖ ശിയ പള്ളിയിലുണ്ടായ ഭീകരാക്രമണത്തില്‍ 20 പേര്‍ കൊല്ലപ്പെട്ടു. മരിച്ചവരില്‍ ഒരു സ്ത്രീയും രണ്ട് കുട്ടികളും ഉള്‍പ്പെടുന്നു. നിരവധി പേര്‍ക്ക് പരുക്കേറ്റു.

വൈകുന്നേരത്തെ നിസ്‌കാരത്തിനിടെ ആയുധങ്ങളുമായി പള്ളിയുടെ ഉള്ളില്‍ പ്രവേശിച്ച അക്രമി വിവേചനരഹിതമായി വെടിയുതിര്‍ക്കുകയായിരുന്നുവെന്നാണ് റിപ്പോര്‍ട്ട്. ഒന്നിലധികം അക്രമികള്‍ ഉണ്ടായിരുന്നില്ലെന്നാണ് പ്രാദേശിക ഭരണകൂടം നല്‍കുന്ന വിവരം.

ഇറാനിലെ എട്ടാം ഷിയ ഇമാമായ ഇമാം റെസയുടെ സഹോദരന്‍ അഹ്മദിന്റെ ദര്‍ഗ സ്ഥിതിചെയ്യുന്ന പള്ളിയിലാണ് ആക്രമണമുണ്ടായത്. ആക്രമണത്തിന്റെ ഉത്തരവാദിത്തം ഐ.എസ്.ഐ.എസ് ഏറ്റെടുത്തതായി മാധ്യമങ്ങള്‍ റിപ്പോര്‍ട്ട്‌ചെയ്തു.