ദുബൈ: ദുബൈയില്‍ നിന്ന് കണ്ണൂരിലേക്ക് എയര്‍ ഇന്ത്യ എക്‌സ്പ്രസ് സര്‍വീസ് ആരംഭിക്കുന്നു. നവംബര്‍ ഒന്ന് മുതല്‍ ആഴ്ചയില്‍ നാല് ദിവസമാണ് സര്‍വീസ്. ആദ്യദിനങ്ങളില്‍ 300 ദിര്‍ഹം നിരക്കില്‍ ദുബൈയില്‍ നിന്ന് കണ്ണൂരിലേക്ക് ടിക്കറ്റ് ലഭിക്കുമെന്ന് എയര്‍ ഇന്ത്യ അധികൃതര്‍ വാര്‍ത്താകുറിപ്പില്‍ അറിയിച്ചു.നവംബര്‍ ഒന്ന് മുതല്‍ ചൊവ്വ, വ്യാഴം, ശനി, ഞായര്‍ ദിവസങ്ങളിലാണ് എയര്‍ഇന്ത്യ എക്‌സ്പ്രസ് കണ്ണൂരിലേക്ക് പറക്കുക. യു.എ.ഇ സമയം വൈകുന്നേരം 6:40 ന് പുറപ്പെടുന്ന ഐ.എക്‌സ് 748 വിമാനം കണ്ണൂരില്‍ ഇന്ത്യന്‍ സമയം 11: 50 ന് എത്തും. ആദ്യദിവസങ്ങളില്‍ 300 ദിര്‍ഹം ടിക്കറ്റ് നിരക്ക്, അഞ്ച് കിലോ അധികബാഗേജ് എന്നീ ആനുകൂല്യങ്ങളും വിമാനകമ്പനി പ്രഖ്യാപിച്ചിട്ടുണ്ട്. കണ്ണൂരില്‍ തിരിച്ച് ഐ.എക്‌സ് 747 വിമാനം തിങ്കള്‍, ബുധന്‍, വെള്ളി, ഞായര്‍ ദിവസങ്ങളില്‍ രാത്രി 12.50 പുറപ്പെടും. ദുബൈയില്‍ പുലര്‍ച്ചെ 3.15 ന് എത്തും. നിലവില്‍ ദുബൈയില്‍ നിന്ന് കണ്ണൂരിലേക്ക് ഗോ ഫസ്റ്റ് വിമാനങ്ങള്‍ മാത്രമാണ് സര്‍വീസ് നടത്തുന്നത്. കണ്ണൂര്‍ സര്‍വീസിന് പുറമെ ആന്ധ്രാപ്രദേശിലെ വിജവാഡയിലേക്ക് ഷാര്‍ജയില്‍ നിന്ന് പുതിയ സര്‍വീസും എയര്‍ ഇന്ത്യ എക്‌സ്പ്രസ് പ്രഖ്യാപിച്ചിട്ടുണ്ട്. ഈമാസം 31 മുതല്‍ തിങ്കള്‍, ശനി ദിവസങ്ങളിലായിരിക്കും ഷാര്‍ജ-വിജവാഡ സര്‍വീസ്. യു എ ഇയില്‍ നിന്ന് വിജയവാഡയിലേക്ക് നേരിട്ട് സര്‍വീസ് നടത്തുന്ന ആദ്യ വിമാനകമ്പനിയാണ് തങ്ങളെന്ന് എയര്‍ ഇന്ത്യ എക്‌സ്പ്രസ് വാര്‍ത്താകുറിപ്പില്‍ പറഞ്ഞു.