തിരുവനന്തപുരം: പാറശാല സ്വദേശി ഷാരോണ്‍ രാജിനെ കഷായത്തില്‍ വിഷം കലര്‍ത്തി കൊലപ്പെടുത്തിയ കേസിലെ പ്രതി ഗ്രീഷ്മ(22) അറസ്റ്റില്‍. തിരുവനന്തപുരം മെഡിക്കല്‍ കോളജില്‍ വച്ചണ് അറസ്റ്റ് രേഖപ്പെടുത്തിയത്. മജിസ്‌ട്രേറ്റിന്റെ സാന്നിധ്യത്തിലാണ് അറസ്റ്റ് രേഖപ്പെടുത്തിയത്.

അതേസമയമം, ഗ്രീഷ്മയുടെ ബന്ധുക്കള്‍ക്കും കൊലപാതകത്തില്‍ പങ്കുണ്ടെന്ന സംശയത്തിലാണ് പൊലിസ്. ഗ്രീഷ്മയുടെ അച്ഛനും അമ്മയും അമ്മാവനും സഹോദരന്റെ മകളും കസ്റ്റഡിയില്‍ തുടരുകയാണ്. ഇവരുടെ മൊഴികളില്‍ പൊരുത്തകേടുകളുണ്ടെന്നും കൂടുതല്‍ അന്വേഷണം നടത്തുകയാണെന്നും പൊലിസ് പറഞ്ഞു.

കസ്റ്റഡിയിലായിരുന്ന ഗ്രീഷ്മ രാവിലെ ആത്മഹത്യയ്ക്ക് ശ്രമിച്ചിരുന്നു. സ്‌റ്റേഷനിലെ ശുചിമുറിയിലുണ്ടായിരുന്ന അണുനാശിനി കുടിച്ചായിരുന്നു ആത്മഹത്യാശ്രമം. ഗ്രീഷ്മയുടെ ആരോഗ്യനില തൃപ്തികരമാണ്.